Erlent

Pólsku forsetakosningarnar: Duda nýr forseti Póllands

Atli Ísleifsson skrifar
Andrzej Duda er andvígur fóstureyðingum, glasameðferðum og hjónaböndum samkynhneigðra. Hann sækir helst stuðning í austurhluta landsins, nærri landamærunum að Úkraínu.
Andrzej Duda er andvígur fóstureyðingum, glasameðferðum og hjónaböndum samkynhneigðra. Hann sækir helst stuðning í austurhluta landsins, nærri landamærunum að Úkraínu. Vísir/AFP
Útgönguspár benda til þess að Andrzej Duda hafi borið sigur úr býtum í seinni umferð pólsku forsetakosninganna sem fram fóru í dag. Duda atti kappi við Bronislaw Komorowski forseta. Komorowski hefur þegar viðurkennt ósigur.

Útgönguspám var frestað eftir að kona lést á kjörstað. Útgönguspár benda til að Duda hafi hlotið 53 prósent atkvæða, en Komorowski 47 prósent.

Hvorugur frambjóðendanna hlaut meirihluta atkvæða í fyrri umferð kosninganna þann 10. maí. Duda hlaut 34,7 prósent atkvæða í fyrri umferðinni, en Komorowski 33,7 prósent.

Forseti Póllands er með takmörkuð völd, en er yfirmaður hers landsins og getur beitt neitunarvaldi á lög þingsins.

Hinn 62 ára Komorowski tók við forsetaembættinu fyrir fimm árum þegar Lech Kaczynski forseti fórst í flugslysi í Rússlandi.

Fréttaskýrandi BBC segir báða frambjóðendurna vera íhaldsmenn, þó að nokkur munur sé á þeim. Komorowski er stuðningsmaður ESB og þykir frjálslyndari en Duda, sem er andvígur fóstureyðingum, glasameðferðum og hjónaböndum samkynhneigðra. Duda sækir helst stuðning í austurhluta landsins, nærri landamærunum að Úkraínu.

Pólverjar kjósa sér nýtt þing í haust.


Tengdar fréttir




Fleiri fréttir

Sjá meira


×