Innlent

Persónuvernd krefst upplýsinga um eftirlitskerfi við Álftanesveg

Sigurður Mikael Jónsson skrifar
Gunnar Einarsson, bæjarstjóri Garðabæjar, segir um tilraunaverkefni að ræða.
Gunnar Einarsson, bæjarstjóri Garðabæjar, segir um tilraunaverkefni að ræða.
Persónuvernd hefur krafið bæjaryfirvöld í Garðabæ um að þau upplýsi hvernig ný fullkomin eftirlitsmyndavél við Álftanesveg samrýmist lögum um persónuvernd, meðferð persónuupplýsinga og reglum um rafræna vöktun.

Vélin, sem gerir yfirvöldum kleift að fylgjast með umferð og greina númeraplötur ökutækja með aðstoð innrauðs ljóskastara, hefur verið starfrækt í rúman mánuð. Bæjaryfirvöld hafa ekki látið Persónuvernd vita af vélinni, þrátt fyrir að rafræn vöktun sé tilkynningarskyld til stofnunarinnar. Bæjarstjóri segir að um samstarfsverkefni við lögreglu sé að ræða og að unnið sé að því að tilkynna málið.

Persónuvernd sendi bæjaryfirvöldum erindi í upphafi mánaðarins vegna vélarinnar sem tekið var fyrir á fundi bæjarráðs í gær. Gunnar Einarsson bæjarstjóri vísaði á fundinum til samþykktar bæjarráðs frá 21. mars síðastliðnum þar sem kemur fram að uppsetning öryggismyndavélarinnar væri samstarfsverkefni bæjarins, lögreglu og Neyðarlínu. Verið væri að ganga frá samstarfssamningi, merkingum á vettvangi og tilkynningu til Persónuverndar.

„Við fórum fyrst að skoða þennan möguleika eftir undirskriftasöfnun íbúa á Álftanesi sem óskuðu eftir öryggismyndavél, hvort það hafi verið mikið um innbrot á þeim tíma. Svo áttum við fund með lögreglunni sem tók vel í samstarf. Við eigum eftir að ganga endanlega frá öllum hnútum gagnvart okkar samstarfsaðila og tilkynna málið til Persónuverndar,“ segir Gunnar og bætir við að tilgangur vélarinnar sé að hægt verði að bregðast við ef eitthvað komi upp á.

„Þá er hægt að rekja það. Svona fyrirkomulag er í öðrum bæjarfélögum sem við vitum um en við lítum á þetta sem tilraunaverkefni.“

Eftirlitskerfið les númer allra bíla sem fara um veginn og skráir þau beint í gagnagrunn sem hægt er að fletta upp í eftir á. Einnig er hægt að setja lista yfir eftirlýst bílnúmer inn í grunninn og fá tilkynningar ef þær bifreiðar aka þar um.

Áætlaður kostnaður við uppsetningu eftirlitsmyndavélarinnar nam um tveimur milljónum króna, sem Gunnar segir að hafi staðist. 






Fleiri fréttir

Sjá meira


×