Handbolti

Óvíst með þátttöku Björgvins gegn Dönum

Eiríkur Stefán Ásgeirsson í Doha skrifar
Björgvin Páll varði vel gegn Egyptum í gær.
Björgvin Páll varði vel gegn Egyptum í gær. vísir/eva björk
Óvíst er með þátttöku Björgvins Páls Gústavssonar í leiknum gegn Danmörku í 16-liða úrslitunum á HM í Katar á morgun.

Björgvin, sem varði 14 skot í marki Íslands gegn Egyptalandi í gær, glímir við meiðsli auk þess sem hann hefur verið slappur að sögn Örnólfs Valdimarssonar, læknis íslenska landsliðsins.

„Bjöggi er smá tæpur í öxl og við erum að reyna að koma honum í gegnum það,“ sagði Örnólfur í samtali við Vísi.

„Það líka smá lasleiki í honum, en hinir eru fínir,“ sagði læknirinn en er einhver pest að ganga?

„Já, það er pest að ganga, eins og var á Íslandi og það eru örfáir búnir að vera með þannig pest hjá okkur.

„Þeir eru í meðferð við því og eru allir að jafna sig nema Bjöggi sem er í smá lægð út af því.

„Þetta byrjaði í fyrrakvöld og var aðallega í gær en hann stóð sig mjög vel í leiknum.

„Hann hvílir bara í dag og tekur réttu töflurnar á morgun og þá verður hann góður,“ sagði Örnólfur.

Leikur Íslands og Danmerkur í 16-liða úrslitunum hefst klukkan 18:00 á morgun en hægt verður að fylgjast með honum í beinni textalýsingu hér á Vísi.




Fleiri fréttir

Sjá meira


×