Óvíst hvort áætlun um Dýrafjarðargöng standist

Síðari hluti samgönguáætlunar ríkisstjórnarinnar fyrir árin 2015 til 2022 er mun frekar óskalisti sem óvíst er að rætist heldur en framkvæmdaáætlun að mati Einars Kristins Guðfinnssonar, þingmanns Sjálfstæðisflokksins í NV-kjördæmi. Í umræðum um samgönguáætlunina á Alþingi kom fram að stofnkostnaður áætlunarinnar á árunum 2011 til 2014 er 21 milljarður króna, 33 milljarðar á árunum 2015 til 2018 og 44 milljarðar á árunum 2019 til 2022. „Það sem verið er að boða okkur á seinni tímabilum er ekki nema fugl í skógi. Við vitum ekkert hvort líklegt sé að þetta verði. Við vitum ekki neitt hvernig staðan verður eftir fjögur eða átta ár. Þess vegna er þetta miklu frekar eins konar óskalisti en í raun og veru framkvæmdaáætlun sem við erum fullviss um á þessari stundu að við getum staðið við,“ sagði Einar Kristinn.

Einar Kristinn benti á að stóru og dýru verkefnin, s.s. Dýrafjarðargöng, Dynjandisheiði og lok Vestfjarðarvegar 60, væru öll á síðustu tímabilunum og því væri óvissa um framvindu þessara verkefna. „Þetta er svo alvarlegt og svo niðurdrepandi fyrir þá sem hafa haft uppi miklar væntingar um að við gætum verið að sjá mögulegar alvöru framfarir í uppbyggingu vega þar sem þeirra er mikil þörf, “ sagði Einar Kristinn.

Sigmundur Ernir Rúnarsson þingmaður Samfylkingar í NA-kjördæmi sagði það hins vegar ánægjulegt að Dýrafjarðargöng væru komin á blað en sá vegartálmi hafi verið einhver sá versti á landinu. Hann ætlar að beita sér fyrir að framkvæmdum m.a. að gerð Dýrafjarðarganga verði flýtt. „Ég mun því berjast fyrir því að framkvæmdum samkvæmt þessari samgönguáætlun, hvað varðar Norðfjarðargöng og reyndar líka hvað varðar Dýrafjarðargöng, verði flýtt og horft verði til ýmissa leiða í þeim efnum,“ sagði Sigmundur Ernir og bætti við að vegamál á Vestfjörðum hefðu lengi verið skör neðar hvað öryggi varðar miðað við aðra landshluta.

Það er mat Sigmundar Ernis að setja eigi Dýrafjarðargöng, Norðurfjarðargöng og samgöngur til Vestmannaeyja í forgang. „Þar búa menn við mun lakari samgöngur og umferðaröryggi en allur almenningur hér á landi. Þess vegna mun ég leggja sérstaka áherslu á að þessum framkvæmdum á umræddum svæðum verði hraðað sem kostur er með þeim úrræðum sem til er að dreifa,“ sagði Sigmundur og hvatti innanríkisráðherra til að skoða allar leiðir sem tækar væru til að flýta þar för.

asta@bb.is