Ótímabundið fjárframlag nýtt til reksturs NAVE

Undanfarin ár hefur dregið verulega úr heildarframlögum ríkisins til Náttúrustofu Vestfjarða (NAVE). Náttúrustofan hefur árlega fengið sérstakt framlag frá ríkissjóði til rekstrar en auk þess hefur fjárlaganefnd Alþingis veitt stofunni framlag til rannsókna. „Nú er svo komið að fasta framlagið dugar vart fyrir launum forstöðumanns enda hefur niðurskurður á föstu framlagi til náttúrustofa verið mun meiri en almennur niðurskurður. Rannsóknafjárveitingin hefur einnig farið lækkandi. Vegna þessa sóttu náttúrustofur sameiginlega til fjárlaganefndar Alþingis fyrir árið 2012 og óskuðu eftir því að viðbótarframlag yrði lagt ótímabundið við grunnfjárveitingu náttúrustofanna í fjárlögum.

Þannig yrði grunnrekstur stofanna tryggður með einni fjárveitingu, eins og gert er ráð fyrir í lögum,“ segir í svarbréfi NAVE til umhverfisráðuneytisins sem hafði óskað eftir upplýsingum um hvernig náttúrustofan hafi ráðstafað tímabundum framlögum ríkis til sérstakra rannsóknarverkefna á undanförnum árum og hvernig hún hyggist ráðstafa 6,4 milljóna króna framlagi á fjárlögum 2012.

Í lögum segir að framlag ríkissjóðs til náttúrustofu er ákveðið í fjárlögum hverju sinni og miðast við fjárhæð sem nemur launum forstöðumanns í fullu starfi að viðbættri fjárhæð sem er allt að jafnhá þeirri fjárhæð og rennur hún til reksturs náttúrustofu. Náttúrustofan hefur litið á rannsóknarfjárveitingu Alþingis sem staðfestingu þess að fast framlag ríkis væri of lágt til að standa undir eðlilegri starfsemi.

Að höfðu samráði við fjárlaganefnd Alþingis var ákveðið að sækja ekki sérstaklega um styrk til nefndarinnar þetta árið. „Það var skilningur undirritaðs að Alþingi hafi með hækkun fjárveitinga til Náttúrustofunnar verið að leiðrétta fasta framlagið,“ segir í bréfinu sem forstöðumaður NAVE ritar. Þar segir að Náttúrustofan sjái því fyrir sér að fjárveitingin sem samþykkt var ótímabundið til viðbótar grunnframlagi á fjárlögum 2012 verði nýtt til reksturs náttúrustofunnar en sá rekstur felur í sér rannsóknir.

Undanfarin ár hefur Náttúrustofan unnið að rannsóknum í Hornstrandafriðlandi og aðliggjandi svæðum fyrir tímabundið fjárframlag Alþingis sem veitt hefur verið til rannsókna stofunnar. Verkefnin hafa verið fjölbreytt en flest fjallað um úttekt á dýralífi og gróðri svæðisins ásamt undirbúningi vöktunar. Rannsóknirnar hófust með rannsóknum á refum í Hlöðuvík 1998 en hafa síðan tekið til fjölmargra þátta náttúrusvæðisins, svo sem fugla, gróðurs, smádýra á landi, í vatni og á strandsvæðum og sérstakri skoðun á ákveðnum vistkerfum. „Rannsóknir Náttúrustofu Vestfjarða fjalla mikið um fjölbreytni lífríkisins á mismunandi stöðum innan svæðisins og á því verður líklega ekki breyting,“ segir í bréfi NAVE.

thelma@bb.is