Öskur setti Tiger úr jafnvægi | Eins höggs forskot fyrir lokahringinn
Tiger slær úr glompu á Bay Hill vellinum.
NORDIC PHOTOS / GETTY IMAGES
Tiger er samanlagt á ellefu höggum undir pari og er í fyrsta sinn í 30 mánuði í forystusætinu fyrir lokahringinn á PGA-móti. Tölfræðin er svo sannarlega hliðholl Tiger. Hann hefur unnið 37 af 39 PGA-mótum þar sem hann hefur verið efstur fyrir lokadaginn að því er AP-fréttastofan greinir frá.
Enginn skildi afskrifa Graeme McDowell sem spilaði einnig á einu höggi undir pari. Síðast þegar McDowell og Tiger voru saman í holli á lokahring á golfmóti vann McDowell upp fjögurra högga forskot Tigers og vann sigur í bráðabana. Það var á Chevron áskorandamótinu í árslok 2010.
Öskur og yfirlið
Forysta Tiger hefði getað verið mun betri ef ekki hefði verið fyrir stórskrýtið upphafshögg hans á 15. holu. Tiger, sem virkar í fantaformi, setti boltann langt út fyrir mörk vallarins og kepptust golfáhugamenn við að gera grín að skotinu.
Síðar um daginn kom í ljós að móðir sem var meðal áhorfenda á vellinum hafði öskrað í miðri sveiflu Tigers vegna þess að liðið hafði yfir son hennar.
„Við erum enn að komast til botns í málinu. Það leið víst yfir 18 ára strák sem féll til jarðar og móðir hans öskraði. Það vildi svo til að það var í miðri sveiflunni minni. Ég reyndi að hætta við en það var of seint. Ég hægði á kylfunni og boltinn lenti út fyrir mörk vallarins," sagði Tiger um atvikið að því er fram kemur á fréttavef Yahoo.
Myndband af atvikinu má sjá með því að smella hér.
Ernie Els eygir möguleika á sæti á Masters
Tiger deildi forystunni að loknum 36 holum með Suður-Kóreubúanum Charlie Wie. Wie fataðist flugið í gær, spilaði á fjórum höggum yfir pari og er á sex undir samanlagt. Þá átti Jason Dufner, sem leiddi ásamt Tiger eftir fyrsta hringinn, afleitan dag og spilaði á fimm yfir pari.
Suður-Afríkubúinn Ernie Els minnti á sig með frábærum hring. Hann spilaði á fimm höggum undir pari og er í þriðja sætinu ásamt Ian Poulter á átta undir pari samanlagt.
Els, sem er í 62. sæti heimslistans, þarf að ná góðum árangri til að tryggja sér þátttökurétt á Masters-mótinu aðra helgi. Fimmtíu efstu sætin á heimslistanum gefa þátttökurétt en Els þarf líklega að minnsta kosti að hafna í þriðja sæti mótsins og jafnvel gera betur en það.
Hér má sjá stöðuna í mótinu.
