Viðskipti innlent

Óskað eftir tillögum að uppbyggingu við Reykjanesvita

Atli Ísleifsson skrifar
Reykjanesviti.
Reykjanesviti. Vísir/GVA
Stjórn Reykjanes UNESCO Global Geopark hefur auglýst eftir áhugasömum aðilum sem tilbúnir eru að hefja uppbyggingu ferðaþjónustu fyrir Reykjanesvita og nágrenni.

Í tilkynningu frá Visit Reykjanes segir að Reykjanes UNESCO Global Geopark og Reykjanesbær hafi undanfarin ár unnið að gerð deiliskipulags fyrir svæðið. Skipulagið var samþykkt í janúar 2016 og gerir ráð fyrir uppbyggingu ferðaþjónustu á hverfisvernduðu svæði.

„Leiðarljós við mat á tillögum verður hve mikil jákvæð áhrif ætla má að tillagan hafi fyrir umhverfi, náttúru og mannlíf á svæðinu. Auk þess sem litið verður til fjárhagslegs og faglegs styrks til þess að ljúka uppbyggingu svæðisins.

Reykjanesviti og nágrenni hafa mikið aðdráttarafl. Áætlað er að um 200.000 gestir hafi heimsótt svæðið á árinu 2015. Með bættu aðgengi ásamt skipulagðri og markvissri uppbyggingu þar og í næsta nágrenni getur svæðið tekið við mun fleiri gestum.

Í nágrenni Reykjanesvita er fyrirhuguð mikil uppbygging í ferðaþjónustu en fyrir eru staðir sem njóta mikilla vinsælda meðal ferðamanna s.s. Brú milli heimsálfa, Gunnuhver og Brimketill,“ segir í tilkynningunni.

Deiluskipulag svæðisins.
Í tillögum þarf í stuttu máli að lýsa áformum um gerð og umfang uppbyggingar, starfsemi og uppbyggingarhraða. Gæta þarf samræmis við deiliskipulag frá janúar 2016.

Aðilum sem tilkynna áhuga verður greint frá vali þeirra sem falið verður að útfæra hugmyndir nánar eigi síðar en 10. mars 2016.






Fleiri fréttir

Sjá meira


×