Innlent

Orkustofnun langar að virkja í túngarðinum hjá umhverfisráðherra

Þóra Kristín Ásgeirsdóttir skrifar
Sigrún Magnúsdóttir umhverfisráðherra segir það hafa komið mjög á óvart, þegar Orkustofnun lagði til að skoðaður yrði virkjunarkostur í túngarðinum hjá henni og eiginmanninum, Páli Péturssyni í landi Höllustaða.

Verkefnisstjórn um rammaáætlun tilkynnti fyrir helgi að hún myndi ekki skoða svæði sem Orkustofnun lagði til að eigin frumkvæði að hún myndi meta. Lögfræðingur Orkustofnunar var ekki sáttur og sagði þetta undarlega stjórnsýslu svo ekki væri dýpra í árinni tekið.

Meðal þessara svæða voru virkjunarkostir sem höfðu lent í verndarflokki en ekki verið friðlýstir. Umhverfisráðherra segist ekki hafa verið hrifin. Henni finnist ekki að leggja eigi til kosti sem er búið að ákveða að vernda.

Það var þó sérlega einn kostur sem kom ráðherranum óþægilega á óvart ef svo má segja nefnilega Blöndudalsvirkjun sem felur í sér að áin Blanda verði stífluð, nánast í túnfætinum hjá henni og eiginmanninum Páli Péturssyni, eða rétt fyrir neðan bæinn á Höllustöðum.

Sigrún segist ekki draga lappirnar

Orkustofnun hafði dregið til baka tvo virkjunarkosti sem kom í ljós að voru innan Vatnajökulsþjóðgarðs enda má ekki skoða friðlýst svæði samkvæmt lögunum, þegar verkefnisstjórn rammaáætlunar ákvað að skoða ekki þau svæði sem stofnunin hefði lagt til og voru í verndarflokki samkvæmt öðrum áfanga rammaáætlunar.

Svandís Svavarsdóttir fyrrverandi umhverfisráðherra benti á að það gerði ferlið að engu ef meta ætti svæði í verndarflokki en lögum samkvæmt á að friðlýsa þau svo fljótt sem kostur er. Hún vildi meina að umhverfisráðherrar núverandi ríkisstjórnar hefðu dregið lappirnar.

Sigrún Magnúsdóttir sagði hinsvegar að þetta kæmi úr hörðustu átt: „Ég er búin að vera ráðherra í fjórar vikur og þetta kemur frá henni sem var það í fjögur ár.“

Sigrún segist aldrei draga lappirnar og unnið sé hörðum höndum í umhverfisráðuneytinu.


Tengdar fréttir

Vindorkan skal líka metin

Þvert á það sem haldið hefur verið fram falla vindorkuver, og aðrir óhefðbundnir orkukostir undir lög um verndar- og orkunýtingaráætlun (rammaáætlun).




Fleiri fréttir

Sjá meira


×