Viðskipti innlent

Ölvaður Murdoch stytti kynni Björgólfs og Claudiu Schiffer

Atli Ísleifsson skrifar
Ástralski fjölmiðlamógúllinn Rupert Murdoch, Björgólfur Thor Björgólfsson og Claudia Schiffer.
Ástralski fjölmiðlamógúllinn Rupert Murdoch, Björgólfur Thor Björgólfsson og Claudia Schiffer.
Björgólfur Thor Björgólfsson segir frá broslegum kynnum sínum og þýsku ofurfyrirsætunnar Claudiu Schiffer á fundi um loftslagsmál í Davos í Sviss í nýrri bók sinni, „Billions to Bust – and Back“.

Í bókinni segir Björgólfur frá því hvernig hann tók þátt í að halda fund um loftslagsmál þar sem fjöldi þekktra var á gestalistanum, Schiffer þeirra á meðal.

Björgólfur lýsir því hvernig einn skipuleggjenda fundarins hafi beðið hann um að taka á móti og fylgja Schiffer, sem hann sagðist glaður geta tekið að sér. Björgólfur fór þá niður í anddyri þar sem hann beið hennar en fékk þá símtal frá Steve Schwarzman, stjórnarformanni Blackstone Group, sem vildi hitta hann þegar í stað.

Björgólfur segist þá hafa boðið öðrum manni í anddyrinu sem hann þekkti til, það starf að taka á móti fyrirsætunni.

„Ég er með draumastarfið fyrir þig. Viltu taka þetta að þér?“ Hann gerði það og ég fór og hitti Schwarzman.

„Ég vona að þú gerir þig grein fyrir því hvað ég er að gera fyrir þig í dag, þar sem með því að hitta þig þá fórna ég því að hitta Claudiu Schiffer,“ sagði Björgólfur við Schwarzman.

Björgólfur segir þá frá því að Schwarzman hafi sýnt þeim mun meiri áhuga á að fara í veisluna til að hitta Schiffer. Þeir félagar gerðu það og ræddu aðeins við ofurfyrirsætuna áður en aðstoðarmaður Björgólfs mætti með aðstoðarmann ástralska fjölmiðlamógúlsins Rupert Murdoch í eftirdragi. Báðu þeir um að fá bíl Björgólfs lánaðan, sem Björgólfur samþykkti og bað um að fá að vera látinn í friði.

Í bókinni segir að þá hafi Murdoch skyndilega birst nokkuð ölvaður og sagði aðstoðarmaður hans að nauðsynlegt væri að koma Murdoch aftur á hótelið. „En þú ert sá eini sem bílstjórinn þekkir í sjón. Þú verður að fara með honum,“ sagði aðstoðarmaður Murdoch, að því er fram kemur.

Björgólfur segist þá hafa afsakað sig og fylgt „glöðum“ Murdoch að bílnum. „Hún var að sjálfsögðu farin þegar ég sneri aftur,“ segir Björgólfur um síðara skiptið sem hann yfirgaf Schiffer fyrr en hann hafði vonast til.






Fleiri fréttir

Sjá meira


×