Handbolti

Óli Stef: Dagur eyðir ekki orku í eitthvað bull

Tómas Þór Þórðarson skrifar
Ólafur Stefánsson og Dagur Sigurðsson eru æskuvinir og fyrrverandi samherjar hjá Val og með landsliðinu.
Ólafur Stefánsson og Dagur Sigurðsson eru æskuvinir og fyrrverandi samherjar hjá Val og með landsliðinu. vísir/ernir/epa
„Hvað á maður að segja? Þetta er alveg stórkostlegt afrek hjá Degi,“ segir Ólafur Stefánsson, besti handboltamaður þjóðarinnar frá upphafi, um æskuvin sinn og fyrrverandi samherja hjá Val og landsliðinu, Dag Sigurðsson.

Eins og allir vita varð Dagur annar Íslendingurinn til að verða Evrópumeistari í gær þegar hann stýrði ungu þýsku landsliði til sigurs gegn Spáni í úrslitaleik EM í Póllandi.

Sjá einnig:Dagur: Angela Merkel bauð okkur í kaffibolla

Þýskaland vann síðast stóran titil árið 2007 þegar það varð heimsmeistari á heimavelli. Síðan þá hefur þessi stærsta handboltaþjóð heims ekki verið í baráttu um verðlaun á stórmótum og þá komst það ekki á Ólympíuleikana í Lundúnum 2012.

„Þjóðverjar eru búnir að vera í lægð síðan 2007. Það hefur ekkert gerst hjá þeim síðan þá en svo kemur Dagur inn og rífur þetta upp á einu ári,“ segir Ólafur við Vísi, en Dagur var fyrir mótið og á því í stórkostlegum meiðslavandræðum.

„Það verður að líta yfir allt mótið hjá honum. Þetta er alveg þvílíkt afrek. Það vita allir að hann er þarna með B-liðið en dínamíkin í liðinu er svo mikið og möguleikarnir í framhaldinu miklir. Þetta er alveg ótrúlegt.“

Dagur lyftir Evrópumeistaraskildinu.vísir/getty
Ferilskráin talar sínu máli

Dagur hefur náð miklum árangri síðan hann fór ungur að árum út í þjálfun í Japan. Hann lyfti grettistaki í austurrískum handbolta, bæði með Bregenz og landsliðið þar í landi, áður en hann gerði svo Füchse Berlín að einu besta liði Þýskalands og kvaddi það með Evrópumeistaratitli síðasta vor.

Sjá einnig:„Athyglin sem Dagur fær á stigi sem maður skilur ekki“

„Þessi árangur hans núna kemur í rauninni ekkert á óvart. Það þarf bara að horfa yfir hans feril og hvernig hann hefur bætt sig. Ferilskrá hans talar sínu máli því hann nær árangri hvar sem hann stígur niður fæti. Þetta er bara eðlilegt framhald af því,“ segir Ólafur.

„Það að þýska liðið var svona gott í riðlakeppninni var alveg stórkostlegt. Þá var liðið búið að ná frábærum árangri en allt umfram það var bara svakalegur bónus.“

Ólafur og Dagur fagna Íslandsmeistaratitlinum 1995 með Val.vísir/brynjar gauti
Leiðtogi frá 5. flokki

Ólafur og Dagur þekkjast mjög vel, en þeir ólust upp saman hjá Val og voru hluti af einu besta handboltaliði Íslandssögunnar. Saman urðu þeir Íslandsmeistarar 1991 og svo fjögur ár í röð frá 1993-1996. Eitthvað sem aðeins Víkingi og Val hefur tekist að gera.

Ólafur hrósar leiðtogahæfileikum Dags og bendir á leikhléin sem hann tók og hvernig hann stýrði þeim. Þar fannst honum einbeitingin skína úr andliti æskuvinar síns og það smitaðist út í leikmannahópinn.

Sjá einnig:„Kraftaverkið í Kraká“ hjá Degi á pari við Dani 1992 og Grikki 2004

„Dagur hefur verið leiðtogi allt frá því hann mætti í fimmta flokkinn í Val. Hann var leikstjórnandi alla sína tíð og fór í þjálfun frekar snemma,“ segir Ólafur.

„Dagur er búinn að þjálfa núna í einhver tíu ár og það hefur verið mikill stígandi á hans ferli. Heilindi eru hans stærsti kostur. Hann eyðir ekki mikilli orku í eitthvað bull og lætur ekki aðra soga úr sér orku.“

„Hann hefur líka þetta íslenska hugarfar að láta ekki menn sem hafa minna um málið að segja trufla sig því hann veit hvað hann vill og það einfaldar hlutina,“ segir Ólafur.

Dagur lætur vel í sér heyra á hliðarlínunni.vísir/epa
Algjörlega maður mótsins

Mikla athygli hefur vakið hvað Dagur er jákvæður á hliðarlínunni og hvernig hann fagnar hverju einasta marki eins og það sé það síðasta sem liðið skorar. Hann er svo ófeiminn við að hrósa sínum mönnum í hástert eftir hvern einasta leik þegar þeir standa sig vel.

„Þessi aðferð er algjörlega málið. Við hrósum alltof lítið og gagnrýnum alltof mikið. Þó gagnrýni felist í því að rýna til gagns þá þarf að ýta undir þegar vel er gert og leyfa mönnum að upplifa það. Þessi jákvæða sálfræði er bara að sanna sig,“ segir Ólafur sem tók púlsinn á Degi í morgun.

„Ég er búinn að vera að senda honum skilaboð yfir allt mótið. Hann svaraði mér í morgun og var greinilega kominn á fætur. Ætli hann sé ekki bara byrjaður að undirbúa Ólympíuleikana. Dagur er allavega algjörlega maður mótsins og þetta er frábært afrek. Það er eins og einhver sagði á Twitter: Við Íslendingar unnum þetta mót svo eftir allt saman,“ segir Ólafur Stefánsson


Tengdar fréttir

Dagur, kunna Íslendingar að fagna?

Íslenski landsliðsþjálfari Þýskalands þótti heldur rólegur í fögnuðinum eftir sigurinn á EM í Póllandi.

Fullkomið Dagsverk

Dagur Sigurðsson fór með hálfgert B-landslið Þýskalands á EM í Póllandi en stóð uppi sem Evrópumeistari eftir magnaða frammistöðu gegn Spáni í úrslitaleiknum. Degi var víða hampað í Þýskalandi eftir sigurinn.




Fleiri fréttir

Sjá meira


×