Viðskipti innlent

Ólafur Stephensen nýr framkvæmdastjóri FA

Atli Ísleifsson skrifar
Ólafur Stephensen.
Ólafur Stephensen.
Ólafur Stephensen, fyrrverandi ritstjóri Fréttablaðsins, hefur verið ráðinn framkvæmdastjóri Félags atvinnurekenda og hefur störf í dag, 1. október. Almar Guðmundsson, sem verið hefur framkvæmdastjóri FA frá 2009, hefur tekið við starfi framkvæmdastjóra Samtaka iðnaðarins.

„Ólafur Þ. Stephensen er 46 ára þriggja barna faðir. Hann lét fyrir rúmum mánuði af starfi ritstjóra Fréttablaðsins og annarra fréttamiðla 365. Áður var hann meðal annars ritstjóri Morgunblaðsins, ritstjóri 24 stunda og aðstoðarritstjóri Morgunblaðsins. Ólafur starfaði einnig um skeið sem forstöðumaður upplýsinga- og kynningarmála hjá Símanum og sem forstöðumaður stefnumótunar- og samskiptasviðs hjá Samtökum atvinnulífsins,“ segir í tilkynningu frá FA.

Ólafur lauk BA-prófi í stjórnmálafræði frá Háskóla Íslands árið 1992 og MSc-prófi í alþjóðasamskiptum frá London School of Economics and Political Science 1994. Þá lauk hann AMP-stjórnendanámi við IESE Business School í Barcelona árið 2010.

„Ég hlakka til að takast á við spennandi verkefni hjá Félagi atvinnurekenda,“ segir Ólafur. „Baráttumál félagsins á borð við frjálst viðskiptaumhverfi, sanngjarna samkeppni og opið hagkerfi falla prýðilega að þeim skoðunum sem ég hef talað fyrir á ýmsum vettvangi. FA á sóknarfæri í að efla enn þjónustu við aðildarfyrirtækin og fjölga í hópi þeirra.“

Birgir Bjarnason, formaður Félags atvinnurekenda, segir þá hjá Félagi atvinnurekenda vera afar ánægða með að fá Ólaf Stephensen í liðið. „Það er ætlun okkar að efla félagið til enn frekari dáða og með honum ásamt því öfluga starfsfólki sem við þegar höfum á að skipa teljum við að við séum á réttri leið.“






Fleiri fréttir

Sjá meira


×