Lífið

Óhljóðalistamaður frá Mexíkó í Mengi

Baldvin Þormóðsson skrifar
Rogelio Sosa fer mikinn í listasenu Mexíkós.
Rogelio Sosa fer mikinn í listasenu Mexíkós. Mynd/ismael mendéz
„Það er alveg frábært að fá hann til Íslands,“ segir Curver Thoroddsen tónlistarmaður um komu japanska óhljóðalistamannsins Rogelio Sosa sem heldur tónleika í Mengi í kvöld.

„Hann er bæði að gera hljóðlistaverk, innsetningar og slíkt,“ segir Curver. „Hann notar mikið röddina sína í bland við hljóðeffekta og gerir tilraunir með hvað rödd og hljóð geta gert saman.“

Sosa býr og starfar í Mexíkó og segir Curver hann vera mjög virkan í listamenningunni þar. „Hann er bæði að kenna og starfar sem sýningarstjóri,“ segir Curver en Sosa hefur einnig gefið út fjöldann allan af hljómplötum.

„Hann átti bara akkúrat leið í gegnum landið á leið sinni til Evrópu þar sem hann er að fara að spila og vinna í stúdíói þar,“ segir Curver. Þeir félagar kynntust í gegnum umboðsmann Sosa þegar Curver var fenginn ásamt hljómsveit sinni Ghostigital til þess að spila í Mexíkó.

Uppsveifla í íslenskri jaðartónlist

„Það er mjög skemmtilegt að það sé svona smá samspil á milli Mexíkós og Íslands,“ segir Curver, en umboðsmaður Sosa hefur mikinn áhuga á íslenskri myndlist og tónlist.

„Það er mikil uppsveifla í svona jaðartónlist á Íslandi,“ segir Curver um senuna hérna heima. „Sérstaklega út af Mengi, það hafa verið æðislegir tónleikar þar.“

Mengi á Skólavörðustíg er tiltölulega ný viðbót við gallerí og tónleikastaðaflóru Reykjavíkur en það var sett á fót síðastliðið haust.

„Það var mun erfiðara að setja saman tilraunakennda tónleika fyrir tíð Mengis,“ segir Curver. „Þetta er frábær aðstaða og kemur með skemmtilega nýja vídd inn í íslenska tónlistarlífið.“

Eins og áður hefur komið fram þá eru tónleikarnir haldnir í Mengi og hefjast klukkan 21.00. Miðaverð er 2.000 krónur.






Fleiri fréttir

Sjá meira


×