Viðskipti erlent

Nýr snjallsími frá Microsoft öflugri en aðrir

Þórgnýr Einar Albertsson skrifar
Satya Nadella, forstjóri Microsoft, kynnir vörur fyrirtækisins.
Satya Nadella, forstjóri Microsoft, kynnir vörur fyrirtækisins. Nordicphotos/AFP
Surface Phone, snjallsími Microsoft sem búist er við að verði settur í sölu í febrúar á næsta ári, er sagður mun öflugri en vinsælustu snjallsímar samkeppnisaðilanna Apple, Google og álíka öflugur og væntanlegur snjallsími Samsung, Galaxy S8.

Þetta kemur fram í upplýsingum sem lekið var í tæknifréttasíðuna Techradar. Er þar greint frá því að síminn verði búinn Snapdragon 835 örgjörva. Sá er öflugri en Snapdragon 821 örgjörvi Google Pixel og Snapdragon 830 sem búist er við því að verði í Galaxy S8. Örgjörvinn í iPhone 7, Apple A10 Fusion, er álíka öflugur og Snapdragon 835.

Snapdragon 835 er búinn Quick Charce 4.0 búnaði sem gerir eiganda símans kleift að hlaða hann hraðar en aðra síma. Heldur Qualcomm, framleiðandi örgjörvans, því fram að hægt verði að fá hleðslu sem endist í fimm klukkustundur á einungis fimm mínútum.

Hins vegar mun Surface Phone, líkt og Galaxy S8, verða útbúinn sex gígabæta vinnsluminni á meðan iPhone 7 Plus er með þriggja gígabæta vinnsluminni og Pixel fjögurra. iTechpost heldur því fram að tvær útgáfur verði í boði af Surface Phone líkt og hinum símunum og verði ódýrari útgáfan útbúinn fjögurra gígabæta vinnsluminni.

Öflugur örgjörvi og mikið vinnsluminni þýðir að Surface Phone verður einn öflugasti snjallsíminn á markaðnum. Þó er ekki vitað hvort síminn verði með Android stýrikerfi eða snjallsímaútgáfu af Windows 10. Ef hið síðarnefnda reynist rétt gæti orðið erfitt að fá forritara til að gefa út snjallforrit fyrir símann enda markaðurinn minni en fyrir iOS stýrikerfi iPhone og Android sem nærri allir aðrir snjallsímar nota.

Þá er hinn nýi Surface Phone sagður verða með 5,5 tommu snertiskjá, jafnstór og Google Pixel XL og iPhone 7 Plus.

Í viðtali við Australian Financial Review sagði Satya Nadella, forstjóri Microsoft, að Surface Phone yrði hinn fullkomni snjallsími. „Við erum hætt að herma eftir öðrum og byrjuð að einbeita okkur að því sem neytendur vilja,“ sagði Nadella.

Tíminn mun leiða í ljós hvort nýjum Surface Phone verði vel tekið en ljóst er að Microsoft eru að standa sig vel þar sem nýkynntar tölvur þeirra, fartölvan Surface Book, og borðtölvan Surface Studio, hafa hlotið mikið lof.

Fréttin birtist fyrst í Fréttablaðinu


Tengdar fréttir

Risavaxinn snertiskjár og áhersla á þrívídd

Microsoft hélt sinn árlega októberviðburð í gær þar sem nýjungar fyrirtækisins voru kynntar til leiks. Þær stærstu eru nýja borðtölvan Surface Studio og ný Surface Book-fartölva sem er talsvert öflugri en fyrirrennari hennar.






Fleiri fréttir

Sjá meira


×