Íslenski boltinn

Nýr formaður í Keflavík: Viljum fyrst klára stjórnarkosningu

Eiríkur Stefán Ásgeirsson skrifar
Keflavík féll úr Pepsi-deild karla í sumar.
Keflavík féll úr Pepsi-deild karla í sumar. Vísir/Andri Marinó
Jón G. Benediktsson, verðandi formaður knattspyrnudeildar Keflavíkur, segir að engin ákvörðun hafi verið tekin í þjálfaramálum félagsins.

Jón er einn í framboði til embættis formanns og verður því sjálfkjörinn á aukaaðalfundi sem fer fram á fimmtudag. Þá verður einnig ný stjórn kjörin en sú gamla sagði af sér undir lok tímabilsins í haust.

Keflavík féll úr Pepsi-deild karla í ár eftir afar erfitt tímabil. Jón sagði í samtali við Víkurfréttir í morgun að fyrsta verkefni nýrrar stjórnar verði að ráða nýjan þjálfara.

Þorvaldur Örlygsson hefur verið orðaður við starfið en hætti á dögunum sem þjálfari HK. Þorvaldur sagði við Vísi að hann útilokaði ekkert um framtíðina og að hann myndi skoða allt sem kæmi upp.

Jón segir þó ekki rétt að viðræður séu hafnar við Þorvald eða neinn annan þjálfara um starfið hjá Keflavík.

„Allar sögusagnir um þessi mál eru úr lausu lofti gripnar. Við erum prinsipp strákar og viljum klára stjórnarkjörin áður en við hefjum viðræður við mögulega þjálfara,“ sagði Jón í samtali við Vísi í dag.

„Við stjórnarmenn höfum hins vegar talað mikið saman og velt öllum mögulegum þjálfurum sem eru á lausu fyrir okkur. Þorvaldur er eðlilega í þeim hópi,“ sagði Jón en Bjarni Jóhannsson, sem á í viðræðum við ÍBV, hefur einnig verið orðaður við starfið.

Jón segir að þeir Haukur Ingi Guðnason og Jóhann Birnir Guðmundsson, sem stýrðu Keflavík lengst af í sumar, komi enn til greina.

„En það verða engar ákvarðanir teknar um viðræður eða neitt slíkt fyrr en að stjórnarkosningu lokinni.“




Fleiri fréttir

Sjá meira


×