Nýr bóksölulisti: Arnaldur á toppnum en kvenrithöfundarnir bíða átekta

Jakob Bjarnar skrifar 25. nóvember 2016 09:29

Jólabókavertíðin er að hefjast og allar taugar eru þandar. Fjórir kvenrithöfundar hafa reimað á sig skóna og eru til alls líklegar á sölulistum.

Konungur glæpasagnanna hefur þegar komið sér fyrir á toppnum, barnabækurnar eru að gera sig gildandi á sölulistum en kvenrithöfundar eru að stilla sér upp í kapphlaupið og eru til alls líklegar.

Fyrsti bóksölulisti þessarar bókavertíðar liggur fyrir. Enn er von á nokkrum bókum úr prentsmiðju en útgáfan virðist vera frekar snemma á ferðinni í ár, að minnsta kosti voru þó nokkrir titlar þegar komnir í verslanir í lok október. Sölutölur bak við listann eru ekki gefnar upp og því má gera ráð fyrir því að ekki sé mikil sala á bak við listann; bókakaupin aukast verulega þegar nær dregur jólum. En, þetta eru uppsöfnuð sala þriggja vikna og sæmilega drjúg þó enn megi meta það sem svo að hún nái ekki einu sinni tíu prósentum jólabókasölunnar sem er í nóvember og desember. Eftir því sem Vísir kemst næst eru síðustu tvær vikurnar fyrir jól margfaldar á við aðrar vikur ársins.

Kannski verður þetta bókavertíðin sem einhverjum tekst að velta glæpasagnahöfundinum úr sessi, af toppi en í raun er ekki margt sem bendir til þess. Hann hefur þegar komið sér notalega fyrir á toppi sölulista og er mættur með sterka bók.gassi

Listinn verður því eilítið skakkur svona í upphafi og einhverjar bækur eru nýkomnar og aðrar hafa þegar tekið út sölu til heitustu aðdáendanna.

Þátttakendur í þessum aðallista eru Bókabúð Forlagsins, Bókabúð Máls og menningar, Heimkaup, Kaupás, Hagkaup, Samkaup, Bónus og Kaupfélag Skagfirðinga, samtals yfir 80 útsölustaðir íslenskra bóka.

Einstök velgengni ljóðabókar Sigurðar Pálssonar

Það vekur kannski athygli að einungis 6 skáldverk ná inná topp 20 listann, þar af ein þýðing. Þetta er metár í útgáfu íslenskra skáldverka, 65 nýjar frumútgáfur eru auglýstar í Bókatíðindum svo ef til vill mun salan dreifast á fleiri verk en áður. Bryndís Loftsdóttir, framkvæmdastjóri Félags íslenskra bókaútgefenda segist samt handviss um að hlutur skáldverka mun aukast á næstu vikum.

Senuþjófurinn á sölulistum að þessu sinni er Sigurður Pálsson ljóðskáld.visir/stefán

„Svo má ekki gleyma þeim stórtíðindum að ljóðabók Sigurðar Pálssonar, Ljóð muna rödd, er á meðal mest seldu bóka topplistans. Ég minnist þess nú ekki í svipan að ljóðabók hafi farið svona kröftuglega af stað en árlega koma þó alltaf nokkrar ljóðabækur sem ná ágætri sölu fyrir jól. Sigurður Pálsson hefur ástæðu til að brosa breitt því hann þýðir jafnframt hluta ljóðabókarinnar Uppljómanir & Árstíð í helvíti, eftir Rimbaud, sem er næst mest selda ljóðabókin það sem af er mánaðar.“

Vísir fjallaði um velgengni Sigurðar Pálssonar í vikunni en sé listinn skoðaður nánar má sjá að Arnaldur Indriðason, konungur glæpasögunnar, hefur komið sér notalega fyrir á toppnum og ekkert fararsnið á honum svo sem, ef litið er til bóksölu undanfarinna ára. Og, nokkrar barnabækur eru á listanum svo sem eftir þá Ævar Þór Benediktsson og Gunnar Helgason. Þeir mega vel við una í 2. og 3. sætinu.

Mikil keppni milli höfunda

„Rithöfundar eru með meira keppnisskap en marga grunar og þessir tveir eiga örugglega eftir að una sér lítillar hvíldar á komandi vikum,“ segir Bryndís. Og heldur áfram: „Ég er handviss um að Arnaldur Indriðason er líka trylltur keppnismaður, en hann fer vel með það og heldur sér til hlés, að minnsta kosti á meðan hann trónir á toppnum. Hann fylgist þó örugglega vel bóksölulistum og sölutölum enda svolítill spennuunnandi.“

Fáir þekkja bókabransann betur en Bryndís. Hún segir rithöfunda með meira keppnisskap en marga grunar.

Kunni menn að lesa í listana, eins og Bryndís, má greina þar mikil átök og baráttu um hylli lesenda. Töluverð nýliðun einkennir þessi jól. Ásdís Halla Bragadóttir er tvímælalaust einn óvæntasti metsöluhöfundur ársins með Tvísögu, ævisögu hennar og móður hennar, sem hún hefur sjálf skráð.

Þrír karlmenn sitja í efstu sætum listans en að þeim sækja konur úr öllum áttum, að sögn Bryndísar:

„Þær Ásdís Halla, Vigdís Grímsdóttir, Kristín Marja og Yrsa Sigurðardóttir raða sér snyrtilega upp í 4.-7. sæti og ætla sér örugglega allar að mölva glerþakið.“

Bóksölulistinn 1.-21. nóvember

20 söluhæstu bækurnar