Lífið

Nýársspá Siggu Kling – Hrúturinn: Þetta verður eins og jarðskjálfti sem er 10 á Richter

Elsku besti Hrúturinn minn. Þetta verður ár bjartsýni og hugrekkis. Þetta ár verður miklu skemmtilegra heldur en árið sem var að líða. Þú ert einhvern veginn orðinn svo miklu sterkari og jákvæðari og munt bara yppa öxlum þótt einhver leggi stein í götu þína. Við getum sagt að síðasta ár hafi skotið styrkum stoðum undir þetta ár, það skiptir að sjálfsögðu mjög miklu máli.

Það er töluvert búið að vera af uppgjörum, búið að klára mörg mál og þú ert miklu ákveðnari núna heldur en þú hefur verið. Þú átt meira að segja eftir að gefa þér tíma til að hvíla þig og njóta lífsins þó að það verði að sjálfsögðu mikið að gera hjá þér. Það verður allt bara einhvern veginn svo miklu meira spennandi sem verður að gerast. Margar ákvarðanir verða teknar áður en júní kemur. Það gæti verið boð um nýja búsetu, það eru góðar tengingar erlendis og allt er eitthvað svo kraftmikið – þetta verður eins og jarðskjálfti sem er 10 á Richter.

Þetta er ástríðufullt ár, allavega helmingurinn af því, og þeim Hrútum sem eru á lausu verður boðið upp í dans og í ævintýri en 2018 er árið sem á eftir að festa þig í framtíðartengslum ef þú ert á lausu, elskan mín. Þetta ár á eftir að líða á eldingarhraða. Að sjálfsögðu flækjast alltaf einhverjar áhyggjur í kringum eitt ár. En þegar ég skoða þetta, þá eru það áhyggjur af öðru fólki en ekki af þinni eigin stöðu og þú getur misst kraft þinn og mátt út af öðrum.

Þetta er árið sem þú ferð til þess að laga orkuna þína og þar sem þú átt eftir að læra margt um andlega hluti og þú munt líka finna sjálfan þig og verða sáttur. Þú þarft að standa með sjálfum þér í upphafi ársins fjárhagslega en ekki hafa of miklar áhyggjur. Það gætu verið einhvers konar svik í kringum þetta tímabil. Þetta getur líka verið í öllu mögulegu. Vertu bara varkár í upphafi ársins, þú átt eftir að finna á þér hvað ég er að tala um og ég er alveg handviss um að þetta er eitthvað sem þú getur leiðrétt. Það er svo margt ótrúlegt sem á eftir að koma upp hjá þér á þessu spennandi ári sem framundan er.

Það er eins og þú flækist í alls konar net af uppákomum sem leiða þig í nýjar áttir. Segðu bara já ef þú ert beðinn um eitthvað (með varkárni þó í upphafi ársins) sem þú myndir venjulega ekki gera, því það mun leiða þig inn í spennandi aðstæður sem gerir lífsárið þitt svo dásamlegt.

Knús og klapp, Sigga Kling

Frægir Hrútar: Hera Björk Þórhallsdóttir söngkona, Silvía Lovetank listamaður, Marta María Jónasdóttir á Smartlandi, Björgvin Halldórsson söngvari, Kári Stefánsson vísindamaður, Vigdís Finnbogadóttir, fyrrverandi forseti, Hugh Hefner, Birgitta Jónsdóttir pírati, Anna Svava Knútsdóttir leikkona, Ólöf Erla, grafískur hönnunarsnillingur, Elton John söngvari, Salka Sól súperdrottning, Þóra í Atlanta, Sigmar Guðmundsson sjónvarpsmaður, Berglind Pétursdóttir, Steinunn Jónsdóttir, söngkona AmabAdamA, Þórhallur Þórhallsson uppistandari, Kristín Þorsteinsdóttir, aðalritstjóri 365 miðla, Alda í Handy pandy, naglalistakona,  Vala Grand, Hjálmar Forni listamaður.






Fleiri fréttir

Sjá meira


×