Innlent

Neita að hafa slitið sæstreng og saka Neyðarlínuna um hryðjuverk

Garðar Örn Úlfarsson skrifar
Á rækjuveiðum í Arnarfirði.
Á rækjuveiðum í Arnarfirði. Mynd/Jón Páll Jakobsson
„Fyrir okkur sjómenn er bara eitt orð að segja um þessar aðgerðir og það er umhverfishryðjuverk,“ segir Sigurður Þórðarson rækjusjómaður um sæstrengsmálið í Arnafirði.

Neyðarlínan lagði í fyrrasumar sæstreng yfir Arnarfjörð til að flytja rafmagn fyrir fjarskiptabúnað á Laugabólsfjalli. Orkubú Vestfjarða tók við rekstri strengsins sem slitnaði síðan í fyrrahaust. Neyðarlínan og Orkubúið kærðu þrjá rækjuskipstjóra til lögreglu vegna málsins. Strengurinn kostaði 17 milljónir og er sagður ónýtur.

Sigurður er stýrimaður á einum þeirra báta sem talið er að hafi togað yfir sæstrenginn en er þó ekki einn þeirra sem voru kærðir.

Jón Páll Jakobsson.
Meiðandi, segir kærður skipstjóri

Jón Páll Jakobsson, einn skipstjóranna þriggja sem kærðir voru vegna sæstrengsins, segir ummæli Þórhalls Ólafssonar, framkvæmdastjóra Neyðarlínunnar, vera meiðandi.

Fréttablaðið greindi frá því í gær að Þórhallur og Kristján Haraldsson orkubússtjóri teldu skipstjórana hafa tekið lögin í sínar hendur og vísvitandi slitið strenginn.

„Framkvæmdastjóri Neyðarlínunar fer með rangt mál, að við rækjusjómenn höfum vísvitandi slitið þennan rafstreng. Að halda slíku fram er fráleitt og jaðrar við meiðyrði. Ég held að menn eins og hann ættu að fara varlega í slíkar yfirlýsingar. Mér vitandi togaði enginn bátur yfir þennan blessaða streng. Þó að bátur sigli yfir sæstreng þá er það ekki nóg – veiðarfæri hlýtur að þurfa að vera í botni,“ segir Jón Páll.

Lögreglunni á Vestfjörðum barst kæra vegna skemmdanna í nóvember. Fulltrúi lögreglustjóra segir málið talsvert flókið vegna tæknilegra gagna sem þurfi að yfirfara.

Strengur lagður þrátt fyrir viðvaranir


„Þeir fara með kapal yfir þar sem eru gjöfulustu rækjumiðin í Arnafirði og gera það þrátt fyrir að öllum aðilum sé áður margbent á það. Hefði ekki verið einfalt að tala við þessa menn sem hafa hagsmuna að gæta og leyfa þeim að koma fram sínum sjónarmiðum eins og íslensk stjórnsýsla á að snúast um?“ spyr Sigurður.

Að sögn Sigurðar neita þeir þrír sem kærðir voru að hafa slitið strenginn viljandi. „Hver myndi fara í ellefu þúsund volta streng vísvitandi? Sjálfsagt hefur hann flækst í veiðarfærum án þess að ég geti fullyrt það,“ segir hann.

Sæstrengur Neyðarlínunnar var sá sjötti sem lagður var yfir fjörðinn. Sigurður segir hina fimm vera niðurgrafna og mun utar. „Þeir eru ekkert að trufla okkur og við vildum að þeir færu með strenginn þá leið. Það er örugglega mun hagkvæmara en að eyðileggja rækjumiðin.“

Deilt er um heimild fyrir sæstreng í Arnarfirði og lögregla rannsakar meint skemmdarverk á honum.Fréttablaðið/Jón Sigurður
Bæjarstjórinn segir strenginn lagðan í óleyfi

Gísli Halldór Halldórsson, bæjarstjóri á Ísafirði, segist hafa skrifað bæði Neyðarlínunni og Orkubúinu bréf í fyrrasumar um að strengurinn væri lagður í óleyfi.

Sjálfur var Gísli formaður umhverfisnefndar bæjarins sem samþykkti erindi um strenginn og framkvæmdir Neyðarlínunnar. Neyðarlínan vísar meðal annars í þessa samþykkt en Gísli segir hana ekki hafa tekið til sæstrengsins því lagnir í sjó heyri ekki undir sveitarfélög.

„Mistökin sem nefndin gerði var að átta sig ekki á eðli sæstrengsins og benda á að hann stangast á við nýtingaráætlun Arnarfjarðar,“ segir bæjarstjóri Ísafjarðar.


Tengdar fréttir




Fleiri fréttir

Sjá meira


×