Tónlist

Nefnt eftir varalit

Stefán Þór Hjartarson skrifar
Cyber dregur nafn sitt af varalit sem var í miklu uppáhaldi hjá stelpunum.
Cyber dregur nafn sitt af varalit sem var í miklu uppáhaldi hjá stelpunum. Mynd/Hrefna Björg Gylfadóttir
Cyber er samvinnuverkefni þeirra Sölku Valsdóttur og Jóhönnu Rakelar Jónasdóttur úr Reykjavíkurdætrum. Á miðvikudaginn gáfu þær út EP plötuna Crap sem er sjö laga stuttskífa sem kom út á Soundcloud-síðu sveitarinnar.

Cyber hefur verið til í nokkurn tíma innan Reykjavíkurdætra samsteypunnar, í raun áður en Reykjavíkurdætur urðu til. Þær hafa áður gefið út lögin Sjálfstæðisfyllerí og Fiðringur en núna hafa þær tekið skrefið alla leið og gefið út plötu undir Cyber-nafninu.

Hvernig eru þið ólíkar Reykjavíkurdætrum og af hverju eru þið í „sér“ hljómsveit?

Salka: „Cyber er kannski ólíkast Reykjavíkurdætrum að því leyti að við erum bara tvær og vinnum þess vegna tónlistina okkar í nánara samstarfi en venjan er hjá Reykjavíkurdætrum. Við höfum það að markmiði að vinna að ákveðnu „soundi“ á meðan Reykjavíkurdætur snúast einmitt um að hafa rými til þess að mega vera mismunandi einstaklingar með alls konar „sound“ og pælingar.“

Jóhanna: „Fyrir Airwaves 2011 var ég svo blönk að ég vældi í Sölku að byrja með mér í hljómsveit og reyna að fá frímiða. Við skírðum þessa hljómsveit eftir uppáhalds MAC-varalitnum okkar, á þeim tíma, sem var einmitt Cyber. Hins vegar átti Cyber upphaflega að vera diskó/trash-metal/pönk dúó. Allt þetta var samt meiri kjaftur í okkur en nokkuð annað. Í rauninni bjóst ég aldrei við því að við myndum gera nokkuð. Svo kem ég heim úr nokkurra mánaða Rússlandsferð um haustið 2013 og viku seinna stígum við á svið sem rapparar á Rappkonukvöldi sem Cyber.“

Jóhanna og Salka voru í raun orðnar Cyber áður en þær urðu Reykjavíkurdætur.Mynd/Hrefna Björg Gylfadóttir
Hvernig plata er þetta? Eruð þið að vinna með einhverjar sérstakar pælingar? Eru gestir? Hverjir pródúsa?

Salka: „Þessi plata er að mörgu leyti drungaleg en samt lífleg og skemmtileg. Það er mjög mikil tilfinning í hverju lagi og lögin í sjálfu sér ólík en samt er einhver „X-factor“ sem bindur þau saman. Lögin eru unnin í mjög nánu samstarfi með ólíkum pródúserum og við erum líka að vinna mikið með vókal sem hljóðfæri á flestum lögum plötunnar.

Platan er eins og gengur og gerist þrútin af upplýsingum og pælingum, sem gerist gjarnan með jafn textamiðaða tónlist og rapptónlist er. Platan sem heild er ekki að vinna með neitt sérstakt þema, það er helst bara að tónlistin er unnin í mjög nánu samstarfi og er þess vegna persónuleg og mikið unnin.

MC Blær er með okkur í tveim lögum, en Blær hefur einmitt unnið mikið með okkur í gegnum árin og þegar við ákváðum að gera þessa EP þá kom ekki til greina að hún myndi ekkert koma að henni. Hún er soldið eins og stóra systir okkar. Við vorum ótrúlega heppnar að fá svo geðveikt mikið af flottum pródúserum að vinna með okkur þ.e. Dj. Flugvél og geimskip, Russian.girls, TY og Marmara.“

Þarf ekki að fagna svona útgáfu? Er eitthvað fleira að fæðast hjá ykkur?

Salka: „Við ætlum að halda útgáfutónleika þann 17. ágúst á vinnustofunni minni á Fiskislóð. Þar verður líka sýnt myndband og mögulega stíga á svið fleiri hljómsveitir. Við erum mjög spenntar að halda þetta á vinnustofunni þar sem við unnum mikið að plötunni þar og ætlum okkur að skapa alveg einstakt rými fyrir útgáfuna.

Líkt og árið 2011 þá ætlum við okkur enn þá að fá að spila á Airwaves, svo við stefnum á það. Annars verður vonandi bara nóg að gera hjá okkur í framhaldi af þessari plötu!“






Fleiri fréttir

Sjá meira


×