Lífið

MR. Ice hjálpaði eftir mikið einelti: Var þunglyndur og karakterinn leyfði honum að blómstra

Stefán Árni Pálsson skrifar
Hlynur er að vinna sig út úr þunglyndi sem kom í kjölfar eineltis.
Hlynur er að vinna sig út úr þunglyndi sem kom í kjölfar eineltis.
Hlynur M Jónsson, sem flestir þekkja sem MR. Ice eða icefit, hefur stofnað sitt eigið ferðaþjónustufyrirtæki sem ber nafnið Ice1trips.

„Er kominn með nýtt ferðaþjónustufyrirtæki sem gerir út frá Akureyri og við sérhæfum okkur i Safari-ferðum, einkaferðum og leggjum mikið upp úr persónulegri og faglegri þjónustu,“ segir Hlynur og bætir við að Safari ferðirnar verða þannig að fólk fær að keyra sjálft jeppana undir leiðsögn og fylgdarbíla og njóta náttúrunnar.

„Við erum litið fjölskyldufyrirtæki með jeppa í einkaferðir og rútu fyrir um 25 manns ásamt Safari Suzuki og ætlum að vanda okkur að skila faglegri og persónulegri þjónustu til okkar ferðamanna og bjóðum upp a skipulagðar dagsferðir ásamt einka-og sérsniðnum ferðum.“

Hlynur er menntaður þjónn og skráði sig á sínum tíma í ferðamálafræði og hefur því góða reynslu í ferðabransanum og þjónustustörfum.

„Ég hætti að neita áfengis fyrir sex árum vegna ýmissa vandamála, niðurbroti og þunglyndi. Svo ég ákvað að skapa icefit fyrir um þremur árum þegar ég var að byrja í fitness til að láta mér líða betur sem einhver annar karakter. Því það kom alltaf upp ákveðið einelti í kollinum á mér og er ég mjög feiminn út á við sem persóna en icefit leyfði mér að blómstra sem vatt skemmtilega upp a sig.“

Hlynur hefur ákveðið að leggja karakternum á hilluna.

„Ég á átta ára dóttir sem býr hjá mér og er ég einstæður faðir og má segja að hún sé ástæðan fyrir því að ég ákvað að leggja áfengið á hilluna. Hún er einnig í rauninni ástæðan fyrir því að ég er hættur sem MR. Ice eða icefit vegna hennar því jú krakkar eiga það nú til að vera svolítið grimmir við hvort annað en megin markmið mitt er alltaf að reyna að hvetja fólk til að vera það sjálft og vera skapandi og hafa gaman af þessu lífi.“

Hlynur hefur orðið fyrir töluverðu einelti í gegnum tíðina.

„Fyrsta lagið sem ég gaf út var eingöngu gert til að sjá og fá öll skítköstin sem komu fram og voru þau mjög mörg. Í rauninni er ótrúlegt hvað fólk getur látið frá sér á netmiðlum og ég hef svosem gert í því að reyna að sjá hvað fólk lætur bögga sig á landinu. Í dag reyni ég að vera opinn og njóta lífsins og því ekkert skemmtilegra en að gera það með ferðamönnum og fólki sem er að njóta lífsins.“

 






Fleiri fréttir

Sjá meira


×