Erlent

Mótmæli í öllum helstu borgum Frakklands

Guðsteinn Bjarnason skrifar
Í gær hófu tugir manna, sem höfðu tekið þátt í mótmælum í París, að fara um hliðargötur og brjóta þar rúður í bifreiðum og verslunum.
Í gær hófu tugir manna, sem höfðu tekið þátt í mótmælum í París, að fara um hliðargötur og brjóta þar rúður í bifreiðum og verslunum. Nordicphotos/AFP
Mótmælin í Frakklandi gegn umdeildri vinnulöggjöf magnast nú dag frá degi. Í gær mætti fjöldi fólks út á götur í helstu borgum landsins. Kjarnorkuver, olíuhreinsunarstöðvar og samgönguæðar hafa lamast.

Óeirðir hafa brotist út í tengslum við mótmælin, sem þó hafa verið friðsamleg að flestu öðru leyti. Í gær hófu tugir manna, sem höfðu tekið þátt í mótmælum í París, að fara um hliðargötur og brjóta þar rúður í bifreiðum og verslunum.

Fyrirhugaðar breytingar á vinnulöggjöf landsins eru gagnrýndar fyrir að snúast einkum um það að auðvelda fyrirtækjum að ráða og reka fólk. Þau fá einnig meira svigrúm til þess að lækka laun og semja um vinnutíma og frídaga.

Til átaka kom milli lögreglu og mótmælenda í Bordeaux í gær.Nordicphotos/AFP
Manuel Valls forsætisráðherra og FranÇois Hollande forseti hafa ekki látið mótmælin hagga sér, fyrr en í gær þegar Valls sagði að vísu ekki koma til greina að hætta við lagabreytingarnar, en hins vegar mætti skoða að breyta þeim eitthvað. Þeir segja breytingarnar nauðsynlegar til þess að draga úr atvinnuleysi, sem mælist ríflega tíu prósent. Meðal ungmenna er atvinnuleysið mun meira, eða nærri 25 prósent.

Einungis hálfur mánuður er þangað til Evrópumeistaramótið í fótbolta hefst í Frakklandi, og telja margir að frönsk stjórnvöld vilji helst að mótmælunum verði lokið áður en mótið hefst. Þetta kunni að eiga þátt í því að ráðamenn séu að verða eftirgefanlegri en áður.

Mótmælin hófust fyrir um þremur mánuðum. Stéttarfélagið CGT, sem er eitt öflugasta verkalýðsfélag Frakklands með meira en 700 þúsund félagsmenn, hefur verið í forystu mótmælanna. Fleiri verkalýðsfélög hafa stutt aðgerðirnar.

Starfsfólk í 16 af 19 kjarnorkuverum landsins hefur samþykkt að fara í verkfall. Þá hafa sex af átta olíuhreinsunarstöðvum landsins lamast vegna aðgerða. Biðraðir hafa myndast á bensínstöðvum vegna yfirvofandi eldsneytisskorts, sem þegar er byrjaður að gera vart við sig. Þriðjungur af bensínstöðvum landsins er að tæmast. Eldsneytisvarabirgðir ríkisins eru taldar endast í nokkra mánuði, en nýtast ekki almenningi.

Flugsamgöngur hafa raskast og lestarsamgöngur sömuleiðis.




Fleiri fréttir

Sjá meira


×