Motherwell í Meistaradeild Evrópu í fyrsta sinn

Skoska fótboltaliðið Motherwell tryggði sér í umspil um sæti í Meistaradeild Evrópu í fyrsta sinn í sögu félagsins. Motherwell er í þriðja sæti deildarinnar en Celtic og Rangers eru þar fyrir ofan. Rangers má ekki taka þátt í Evrópukeppni á næstu leiktíð vegna fjárhagsvandræða félagsins og Motherwell fær því tækifærið. Celtic hefur tryggt sér meistaratitilinn fyrir löngu.

Það var Rangers sem tryggði Motherwell þriðja sætið með 5-0 sigri í gær gegn Dundee Utd. Stuart McCall er knattspyrnustjóri Motherwell en hann lék m.a. 40 landsleiki fyrir Skotland. Hann var miðjumaður og átti farsælan feril með Everton í efstu deild á Englandi (1988-1991), Rangers í Skotlandi (1991-1998) og hann lauk ferlinum með ensku liðunum Bradford og Sheffield Utd.