Golf

Mikil spenna eftir fyrsta dag á Íslandsmótinu í golfi

Ingvi Þór Sæmundsson skrifar
Signý og Sunna Víðisdóttir deila efsta sætinu í kvennaflokki.
Signý og Sunna Víðisdóttir deila efsta sætinu í kvennaflokki. mynd/gsí
Íslandsmótið í golfi hófst í gær á Garðavelli á Akranesi. Mótinu lýkur á síðdegis á sunnudaginn.

Þórður Rafn Gissurarson, GR, lék manna best í karlaflokki í gær; á alls 67 höggum, eða fimm höggum undir pari. Þórður, sem hefur leikið á nærri 20 atvinnumótum á þýsku Pro Golf-mótaröðinni á þessu ári, hefur ekki enn orðið Íslandsmeistari en byrjunin hjá honum í ár lofar góðu.

Axel Bóasson, GK, er í 2. sæti en hann lék á 69 höggum, eða þremur höggum undir pari. Ragnar Már Garðarsson, GKG, kemur næstur í 3. sæti en hann lék á 70 höggum, eða tveimur höggum undir pari.

Andri Már Óskarsson (GKG), Haraldur Franklín Magnús (GR) og Guðmundur Ágúst Kristjánsson (GR) eru jafnir í 4.-6. sæti en þeir léku allir á 71 höggi, eða einu undir pari.

Í kvennaflokki deila þær Sunna Víðisdóttir, GR, og Signý Arnórsdóttir efsta sætinu eftir fyrsta daginn. Þær léku báðar á 71 höggi, eða einu höggi undir pari.

Valdís Þóra Jónsdóttir, GL, kemur næst í 3. sæti en hún lék á 73 höggum, eða einu höggi yfir pari.

Ríkjandi Íslandsmeistarinn Ólafía Þórunn Kristinsdóttir, GR, er í 4. sæti en hún lék á 74 höggum, eða tveimur höggum yfir pari.

Sigurlaug Rún Jónsdóttir, GK, er svo í 5. sæti á 75 höggum, eða þremur höggum yfir pari.

Vegna mistaka voru upplýsingar um gang mála í kvennaflokki ekki með í Fréttablaðinu í dag. Beðist er velvirðingar á þeim.




Fleiri fréttir

Sjá meira


×