Miðvarðahallæri hjá Arsenal fyrir bikarúrslitaleikinn

Arsene Wenger, knattspyrnustjóra Arsenal, er vandi á höndum fyrir bikarúrslitaleikinn gegn Chelsea á laugardaginn en það er miðvarðahallæri hjá liðinu.

Laurent Koscielny verður í leikbanni vegna rauða spjaldsins sem hann fékk í 3-1 sigrinum á Everton í lokaumferð ensku úrvalsdeildarinnar á sunnudaginn. Arsenal áfrýjaði rauða spjaldinu en það stendur.

Brasilíumaðurinn Gabriel meiddist á hné í leiknum gegn Everton og var borinn af velli. Nú er ljóst að hann verður frá í allt að því átta vikur vegna meiðslanna. Það er því útséð með þátttöku hans í bikarúrslitaleiknum.

Þá glímir Shkodran Mustafi við afleiðingar höfuðhöggs sem hann fékk í leik gegn Sunderland í síðustu viku. Óvíst er hvort hann verði klár fyrir laugardaginn.

Wenger hefur spilað leikkerfið 3-4-3 að undanförnu en á varla miðverði í það eins og staðan er núna.

Rob Holding hefur spilað vel að undanförnu og verður væntanlega í liðinu á laugardaginn. Per Mertesacker spilaði sinn fyrsta leik á tímabilinu gegn Everton og þá hefur Nacho Monrel af og til leyst stöðu miðvarðar.

Bikarúrslitaleikurinn á laugardaginn er sá áttundi hjá Arsenal undir stjórn Wengers. Hann hefur unnið sex bikarmeistaratitla sem stjóri Arsenal.