Messan: Özil átti smá stund með sjálfum sér | Myndband

„Loksins fann Arsenal gírinn og þeirra stærsta stjarna datt svo sannarlega í gírinn,“ sagði Hjörvar Hafliðason um frammistöðu Þjóðverjans Mesuts Özil í leik Arsenal og Aston Villa í Messunni í gær.

Eftir þrjú jafntefli í röð tóku Arsenal-menn aftur við sér og unnu öruggan 0-3 sigur á taplausu liði Aston Villa á útivelli. Özil, sem hefur fengið mikla gagnrýni fyrir frammistöðu sína að undanförnu, vaknaði til lífsins; skoraði mark og lagði annað upp.

„Það er engu líkara en að Özil hafi átt smá stund með sjálfum sér eftir leikinn gegn Dortmund í Meistaradeildinni, horft í spegil og hugsað með sér: Jæja, núna ríf ég þetta í gang. Það var allt annað að sjá strákinn á laugardaginn,“ bætti Hjörvar við.

Umræðuna um Arsenal og Özil má sjá í heild sinni í spilaranum hér að ofan.