Enski boltinn

Meistararnir í fallsæti eftir sigur Crystal Palace | Úrslit dagsins

Kristinn Páll Teitsson skrifar
Leikmenn Palace fagna sigurmarki bakvarðarins Van Aanholt.
Leikmenn Palace fagna sigurmarki bakvarðarins Van Aanholt. vísir/getty
Crystal Palace undir stjórn Sam Allardyce vann lífsnauðsynlegan 1-0 sigur á Middlesbrough á heimavelli í dag en með sigrinum lyfti Crystal Palace sér upp fyrir Leicester og upp úr fallsæti í bili.

Hollenski bakvörðurinn Patrick Van Aanholt sem gekk til liðs við Crystal Palace í félagsskiptaglugganum skoraði eina mark leiksins í fyrri hálfleik eftir góðan undirbúning Yohan Cabaye.

Reyndist það vera eina mark leiksins en með sigrinum er Crystal Palace komið upp að hlið Middlesbrough með 22 stig en nýliðar Middlesbrough hafa ekki unnið leik í ensku úrvalsdeildinni í rúmlega tvo mánuði.

Á Goodison Park unnu heimamenn nokkuð sannfærandi 2-0 sigur gegn gamla stjóranum David Moyes og hans mönnum í Sunderland en það voru Idrassa Guyeye og Romelu Lukaku sem skoruðu mörkin fyrir Everton.

Everton hefur nú leikið níu leiki í röð án taps í ensku úrvalsdeildinni og eru strákarnir hans Ronald Koeman hægt og bítandi að fikrast upp töfluna en fjögur stig eru í Manchester United.

Á The Hawthorns tókst West Bromwich Albion að kom til baka eftir að hafa lent undir snemma leiks og vinna 2-1 sigur gegn Bournemouth en þetta var sjötta tap Bournemouth í síðustu sjö leikjum.

Joshua King kom gestunum frá Bournemouth yfir á 5. mínútu en tvö mörk með tíu mínútna millibili frá Craig Dawson og Gareth McAuley tryggðu Albion-mönnum stigin þrjú. Eftir að hafa fengið ellefu stig af síðustu fimmtán er West Brom komið upp í efri hluta deildarinnar í áttunda sætið.

Að lokum skyldu nýliðar Hull og Burnley jöfn á heimavelli Hull City en Michael Keane jafnaði metin fyrir Burnley stuttu eftir að Tom Huddlestone kom Hull yfir af vítapunktinum.

Ashley Barnes sá rautt í uppbótartíma í seinni hálfleiks en heimamönnum mistókst að nýta sér það en það þýðir að Hull er áfram í fallsæti að 26. umferðum loknum en Burnley er um miðja deild með 31 stig í 11. sæti.

Úrslit dagsins:

Chelsea 3-1 Swansea

Everton 2-0 Sunderland

Crystal Palace 1-0 Middlesbrough

West Brom 2-1 Bournemouth

Hull City Tigers 1-1 Burnley




Fleiri fréttir

Sjá meira


×