Viðskipti innlent

Markaðsmisnotkun í Glitni: Fylgt út á stétt af yfirmönnum í kjölfar uppsagnar

Hulda Hólmkelsdóttir skrifar
Verjendur að gera sig klára fyrir aðalmeðferðina. Í bakgrunni má sjá Lárus Welding og Jóhannes Baldursson.
Verjendur að gera sig klára fyrir aðalmeðferðina. Í bakgrunni má sjá Lárus Welding og Jóhannes Baldursson. Vísir/Anton Brink
Pétur Jónasson, einn ákærða í markaðsmisnotkunarmáli Glitnis, segist hafa unnið í afar stuttan tíma fyrir deild eigin viðskipta hjá bankanum og því geta lítið tjáð sig um hver stefna bankans var um kaup á bréfum í bankanum. Þetta kom fram í máli Péturs við aðalmeðferð málsins í Héraðsdómi Reykjavíkur í dag.

Pétur starfaði hjá deild eigin viðskipta frá mars til september árið 2007 og var síðar færður til annara starfa í bankanum þar til honum var sagt upp störfum í mars árið 2008. Hann segir það hafa haft mikil áhrif á sig að hafa stöðu sakbornings í málinu í langan tíma. 



Fylgt út á stétt


Pétur var fyrst boðaður í skýrslutöku vegna málsins í nóvember árið 2011 og liðu þá fimm ár þangað til gefin var út ákæra í málinu en það var gert í apríl árið 2016. Nú, tæpum tveimur árum seinna, hefst aðalmeðferð í málinu.

Hann segir málið hafa haft mikil og neikvæð áhrif á hann og hans starfsferil. Hann hafi verið ungur og nýútskrifaður úr námi þegar hann hóf störf við bankann.

Í maí 2008 hafi honum svo verið sagt upp störfum og sagði hann að Magnús Pálmi Örnólfsson, þáverandi forstjóri eigin viðskipta og gjaldeyrisstýringar bankans, og Jóhannes Baldursson þáverandi forstöðumaður markaðsviðskipta Glitnis hafi í kjölfar fundar fylgt honum út úr byggingu Glitnis og út á stétt.

„Ég var ekki merkilegri starfsmaður en það,” sagði Pétur. Hann sagði það hafa einnig hafa haft áhrif á fjölskyldu hans og sálarlíf.

„Enda hef ég þurft að leita mér hjálpar út af því.“

Pétur starfaði hjá deild eigin viðskipta frá mars til september árið 2007 og var síðar færður til annara starfa í bankanum þar til honum var sagt upp störfum í mars árið 2008.Vísir
Man ekki eftir formlegum fyrirmælum

Pétur segist hafa litið á Jónas Guðmundsson, sem einnig er ákærður í málinu, sem óformlegan yfirmann sinn, enda hafi hann verið eldri og reyndari en hann sjálfur.

Hann segir að fáir fundir hafi verið innan deildar eigin viðskipta þá mánuði sem hann starfaði þar. Hann hafi ekki setið neina fundi með Jóhannesi Baldurssyni utan ráðningarviðtals.

Pétur lýsti því að starf hans hafi aðallega verið fólgið í því að sjá um formlegar viðskiptavaktir en að fyrir liggi að hann hafi keypt bréf í Glitni. Hann sagði það hafa verið gert að undirlagi Jónasar.

Saksóknari benti á að Pétur hafi aðallega keypt bréf í bankanum þegar Jónas var fjarverandi og sagðist hann ekki muna eftir að hafa fengið formleg fyrirmæli þess efnis og að á þeim tíma hafi þau virst vera góður fjárfestingarkostur.

Viðskipti eftir að Pétur var færður til innan bankans

Þann 16. september 2008 hafi hann verið færður til í starfi og unnið við gjaldeyrisstýringu og enn verið undirmaður Magnúsar Pálma. Hann segist ekkert hafa komið að hlutabréfakaupum eftir það.

Meðal gagna málsins eru þó skjöl sem sýna að fjárfest var í nafni Péturs í bréfum í bankanum alls sjö sinnum í október 2008. Pétur segist telja að það hafi verið viðskipti fyrir Valgarð Má Valgarðsson, sem einnig er ákærður í málinu. Líklegt sé að hann hafi opnað kerfið fyrir Valgarð svo hann gæti átt í viðskiptum.

Pétur sagðist engin samskipti hafa átt við Lárus Welding, fyrrverandi forstjóra bankans og að hann hafi aldrei fengið fyrirmæli frá honum um hvernig hann ætti að haga starfi sínu. Þá sagðist hann lítil samskipti hafa átt við Jóhannes Baldursson og að hann hafi aldrei fengið fyrirmæli frá honum um hvernig ætti að stilla upp tilboðum innan kauphallarinnar.


Tengdar fréttir






Fleiri fréttir

Sjá meira


×