Viðskipti innlent

Markaðsmenn horfi meira til fjölmiðlafólks

ingvar haraldsson skrifar
Eid segir að fjölmiðlar gætu orðið fyrirmynd að verklagi sem markaðsfólk þurfi að taka upp.
Eid segir að fjölmiðlar gætu orðið fyrirmynd að verklagi sem markaðsfólk þurfi að taka upp. vísir/gva
„Heiminn breytast mun hraðar en áður,“ segir Luke Eid sem stýrir alþjóðlegu neti stafrænnar miðlunar hjá alþjóðlegu auglýsingastofunnar TBWA. Eid hefur m.a. stýrt stafrænni markaðssetningu fyrir Nissan, Pacific Brands, Coach og Standard Charter Bank. „Auglýsingastofur á borð við TBWA þurfa að bregðast við mun hraðar en áður. Í hefðbundnum markaðsherferðum höfum við haft marga mánuði, jafnvel ár til að undirbúa okkur en í fjölmiðlaumhverfi dagsins í dag þarftu að geta brugðist við samstundis,“ segir hann.

Eid segir það mikla áskorun fyrir markaðsfólk að takast á við ­þennan breytta heim. Hann ­nefnir fjórar ástæður fyrir þessum breytingum. Í fyrsta lagi sé hægt að komast þráðlaust á netið nær hvar sem er. Í öðru lagi hafi innreið snjalltækja á borð við síma, úr og jafnvel bíla valdið því að fólk sé alltaf í sambandi við umheiminn. Í þriðja lagi hafi innreið samfélagsmiðla haft miklar breytingar í för með sér. Í fjórða lagi hafi svo þessar tækninýjungar valdið því að tískubylgjur og menning breytist mun hraðar en áður.

„Allt þetta veldur því að vörumerki þurfa að bregðast við mun hraðar en áður,“ segir hann.

„Það er til fræg tilvitnun eftir Ray Kurzweil, verkfræðing hjá Google og rithöfund, sem segir að heimurinn muni ekki sjá 100 ár af framþróun næstu öldina heldur tuttugu þúsund ár. Svo breytingarnar eru að eiga sér stað í veldisvexti.“

Eid segir að fram til þessa hafi markaðs- og auglýsingastofur brugðist við nýjum miðlum með nýjum sérfræðideildum. Innreið internetsins hafi kallað á sérstakar markaðsstofur fyrir netið, sama hafi gilt um snjallsímana og svo síðast með innreið samfélagsmiðla. „En þegar heimurinn er að breytast mun hraðar en áður getur þetta flókna kerfi ekki brugðist nógu hratt við. Svo stóra áskorunin er að endurskipuleggja hvernig við vinnum sem ein heild,“ segir Eid.

Eid nefnir vinnulag fjölmiðlafólks sem góða fyrirmynd að vinnulagi sem markaðsfólk þurfi að taka upp. „Fjölmiðlar eru mjög fljótir að bregðast við hlutum þegar þeir gerast. Rit­stjórnin hittist á hverjum morgni og úthlutar verkefnum til blaða- og fréttamana og sendir þá á staði. Þeir koma svo aftur og þá þarf að ákveða hvað er birt. Þetta er fyrirkomulag sem við þyrftum að laga okkur að en erum ekki vön,“ segir Eid.

Hann telur að næsta bylting verði endurkoma myndbanda. „Við erum komin heilan hring. Kvikmyndir og sjónvarp voru áhrifamesta efnið á 10. áratugnum en svo komu stafrænu miðlarnir og við fórum að gera borða og heimasíður. En við sem skapandi geiri erum einna best í því að segja sögur, við sköpum tilfinningaleg viðbrögð, hlátur eða grát. Ef þú skoðar Facebook-veggi þá er meirihluti þeirra orðinn myndir og myndbönd frekar en texti. Mark Zuckerberg hefur sagt að á næstu árum verði Face­book-veggurinn bara myndir og myndbönd svo ég held að við séum að fara aftur í að segja sögur, en leikurinn er breyttur, það verða ekki bara þaulskipulögð 30 eða 90 sekúndna myndbönd. Það gæti þurft að búa til 7 sekúndna myndband til að fá fólk til að horfa á 90 sekúndna myndbandið,“ segir Eid.






Fleiri fréttir

Sjá meira


×