Viðskipti innlent

Már styður breytingar á lögum um Seðlabankann

Heimir Már Pétursson skrifar
vísir/gva
Már Guðmundsson seðlabankastjóri er ánægður með þá ákvörðun fjármálaráðherra að skipa hann í embætti seðlabankastjóra í fimm ár til viðbótar, enda hafi hann sótt um stöðuna af heilum hug.

Í skipunarbréfinu minnir fjármálaráðherra á að nú sé að störfum sérfræðinefnd um heildarendurskoðun laga um Seðlabankann sem skili af sér fyrir áramót og geti haft áhrif á störf Más á fimm ára skipunartíma hans.

„Ég náttúrlega vissi það áður en ég bauð mig fram í þetta og það er reyndar ferli sem ég hef lýst yfir áður að ég styðji. Vegna þess að það er algerlega klárt að það er þörf á heildarendurskoðun á lögum um bankann og þar með talið að skoða yfirstjórn hans,“ segir Már.

Hann sendi frá sér yfirlýsingu eftir að ákvörðun fjármálaráðherra lág fyrir í dag þar sem hann upplýsir að hugur hans hafi um nokkurt skeið staðið til þess að hverfa aftur til starfa á alþjóðavettvangi eftir einhvern tíma. Það hafi hins vegar ekki hentað núna af persónulegum ástæðum sem og vegna verkefnastöðunnar hjá Seðlabankanum. Það hefði verið mikið rask að skipta út á þessum tímapunkti.

„Þannig að það getur vel verið,  alveg óháð þessum breytingum, að þá er ekki endilega víst að ég verði allt tímabilið,“ segir Már.

Fjármálaráðherra sagði í fréttum Stöðvar tvö í vikunni að hann hallaðist æ meira að því að fjölga ætti seðlabankastjórunum.

„Það er náttúrlega bara Alþingis að ákveða hvernig fyrirkomulagið er. Ég ætla ekki að tjá mig um það núna. Nú er sú vinna framundan. Það eru alls konar möguleikar til og alls konar módel um það í öðrum löndum. Nú er bara nefnd að störfum og hún auðvitað leggur eitthvað til sem hún telur best. Svo hefur Alþingi lokaorðið þannig að ég geri enga athugasemd við þá vinnu,“ segir Már Guðmundsson.


Tengdar fréttir

Nýr Seðlabankastjóri kynntur í dag

Bjarni Benediktsson, efnahags- og fjáramálaráðherra, mun tilkynna eftir hádegi í dag hver muni skipa embætti Seðlabankastjóra næstu fimm árin samkvæmt heimildum fréttastofu.






Fleiri fréttir

Sjá meira


×