Mao-iðnaður fyrir Ólympíuleika

Heilmikill Mao-iðnaður er orðinn til fyrir Ólympíuleikana sem hefjast í Kína eftir rúma viku. Þessi fyrrum æðsti leiðtogi Kína nýtur enn mikillar hylli meðal Kínverja og nú er arfleifð hans og ímynd meðal þess helsta sem ferðamenn í Kína sækja í. Fréttastofa beinir kastljósinu að Kína í dag og næstu daga í aðdraganda Ólympíuleikanna.

Maó-iðnaðurinn er hvergi meira áberandi en í Hunan, heimahéraði formannsins. Utan Kína er Maós helst minnst sem harðstjóra sem ber ábyrgð á dauða og hörmungum milljóna manna sem liðu fyrir Menningarbyltinguna miklu og Stóra framfaraskrefið - iðnvæðingu þessa stórveldis.

Í Hunan er þessu farið á annan veg. Þangað koma árlega rúmlega þrjár milljónir manna í einskonar pílagrímsferðir til að skoða smábæinn Shaoshan þar sem hann ólst upp - þeir skoða húsið sem hann fæddist í, skólann sem hann gekk í og staði þar sem hann lék sér sem lítill drengur.

Í Shaoshan hans sjá menn enga ástæðu til annars en að halda nafni formannsins á lofti.

Þar eru mörg söfn tileinkuð honum og allir þeir sem bera ættarnafnið Maó gera það með stolti. Í þeirra augum var Maó ekki aðeins stofnandi alþýðulýðveldisins, heldur maðurinn sem frelsaði landið undan oki keisaraveldisins, spillingar og eymdar, og gerði Kína að því stórveldi sem það er nú.

Og þótt ef til vill megi kenna landbúnaðarstefnu Maós um að milljónir manna liðu stórkostlegan skort eða týndu lífi, þá njóta núlifandi íbúar arfleifðarinnar - 85% af öllum tekjum Shaoshan koma nú frá Maó-túristunum. Andlit hans er þar á öllum mögulegum og ómögulegum stöðum og varningi á líflegum útimörkuðum. Á þessu vasaúri segir til dæmis að félagi Mao ze-döng verði um eilífð í hjörtum alþýðunnar.

Og ef ekki væri fyrir formanninn, þá væru flestir þessara kaupmanna sjálfsagt að strita á svínabúum eða ökrum, eins og flestir gera í nágrannabæjunum - og eins og forfeður þeirra hafa gert mann fram af manni.