Innlent

Mál borgarfulltrúa bíður fram yfir kosningar

Jón Hákon Halldórsson skrifar
Kristín Soffía var kjörin borgarfulltrúi árið 2014. Hún hefur búið í Danmörku á kjörtímabilinu. Vafi leikur á því hvort hún sé kjörgeng. Fréttablaðið/Ernir
Kristín Soffía var kjörin borgarfulltrúi árið 2014. Hún hefur búið í Danmörku á kjörtímabilinu. Vafi leikur á því hvort hún sé kjörgeng. Fréttablaðið/Ernir
Forsætisnefnd borgarstjórnar fundaði í gærmorgun um kjörgengi Kristínar Soffíu Jónsdóttur, borgarfulltrúa Samfylkingarinnar. Engin ákvörðun var tekin á fundinum og er búist við því að fundað verði aftur um málið eftir alþingiskosningarnar.

Líf Magneudóttir segir koma til greina að leita út fyrir hús að áliti lögfræðings.
Eins og Fréttablaðið hefur greint frá leikur vafi á því hvort Kristín Soffía er kjörgeng sem borgarfulltrúi eftir að hún sneri aftur til starfa í borgarstjórn, eftir rúmlega árs leyfi. Ástæðan er sú að á meðan hún var í leyfinu flutti hún lögheimili sitt til Danmerkur, án þess að bera það undir borgarstjórn áður.

Í 37. grein samþykktar um stjórn Reykjavíkurborgar og fundarsköp Reykjavíkurborgar segir að þegar borgarfulltrúi flytur úr sveitarfélaginu um stundarsakir „má borgarstjórn ákveða, að hans ósk, að hann skuli víkja úr borgarstjórn þar til hann tekur aftur búsetu í Reykjavík. Slík ákvörðun skal tekin áður en borgarfulltrúi flytur um stundarsakir.“

„Það kemur til greina að leita út fyrir hús að áliti frá lögfræðingi,“ segir Líf Magneudóttir, spurð um það hvernig hægt sé að fá niðurstöðu í málið.

Samkvæmt sveitarstjórnarlögum úrskurðar borgarstjórn um kjörgengið. Þeim úrskurði má skjóta til innanríkisráðuneytisins og niðurstöðu innanríkisráðuneytisins má svo skjóta til dómstóla.


Tengdar fréttir

Vafi leikur á kjörgengi fulltrúa Samfylkingar í borgarstjórn

Kristín Soffía Jónsdóttir hefur tekið sæti í borgarstjórn eftir dvöl erlendis í fæðingarorlofi. Samþykkt Reykjavíkurborgar gerir ráð fyrir að borgarfulltrúi sem fer í leyfi fái samþykki borgarstjórnar áður en hann flytur lögheimili sitt.




Fleiri fréttir

Sjá meira


×