LV ekki í boðsferðum

„Stjórn Lífeyrissjóðs Vestfirðinga hefur ekki farið í eina einustu boðsferð og ég held að við höfum ekki fengið boð í eina einustu boðsferð. Ég fór í einhverjar kynnisferðir erlendis, flestar til Lundúna, þar sem við vorum að kaupa erlend skuldabréf og í skuldabréfasjóðum. Þessar ferðir voru greiddar af sjóðnum en ég fór í engar boðsferðir. Það hefur alltaf verið okkar regla að sjóðurinn borgi slíkar ferðir,“ segir Guðrún K. Guðmannsdóttir, framkvæmdastjóri Lífeyrissjóðs Vestfirðinga.

Í úttekt Landssamtaka lífeyrissjóða á fjárfestingarstefnu, ákvörðunum og lagalegu umhverfi lífeyrissjóða í aðdraganda efnahagshrunsins árið 2008 voru gerðar athugasemdir við nokkrar ferðir sem starfsmenn lífeyrissjóða á Íslandi fóru í þar sem fyrirtæki borguðu kostnaðinn. Guðrún segir að fyrirtæki hafi ekki haft sérstakan áhuga á lífeyrissjóðum sem voru af sömu stærðargráðu og Lífeyrissjóður Vestfirðinga, litlir lífeyrissjóðir þóttu ekkert sérstaklega spennandi. Hún gerir ekki ráð fyrir að forsvarsmenn sjóðsins hefðu þegið slíkar ferðir, hefðu þær boðist.

Sjóðurinn setti sér samskipta- og siðareglur í apríl 2009 en fyrir þann tíma voru engar haldbærar reglur til. „Við erum með mjög stífar reglur um þetta núna, en flestir lífeyrissjóðir voru að setja þessar reglur á árunum 2008 eftir hrun og 2009,“ segir Guðrún. Farið er yfir reglur Lífeyrissjóðs Vestfirðinga í úttektinni. Þar kemur fram að samskipti við viðskiptaaðila á markaði eigi aðeins að þjóna því markmiði að ná sem bestri ávöxtun á fé sjóðsins og virða almennt viðskiptasiðferði. Þá fjalla reglurnar um ferðalög starfsmanna sjóðsins en slíkar ferðir geta verið nauðsynlegar fyrir starfsmenn til að afla sér góðra upplýsinga um möguleika á fjármálamarkaði. Sjóðurinn ber kostnað af slíkum ferðalögum og öllum gögnum um þau haldið til haga í eitt ár. Einnig verða viðburðir í tengslum við slíkar ferðir að vera innan eðlilegra marka.

Þá er í reglunum bann við að þiggja gjafir frá viðskiptaaðilum sjóðsins nema að um sé að ræða persónuleg tengsl við þá eða þær séu innan eðlilegra marka sem jólagjafir eða tækifærisgjafir.

asta@bb.is