Innlent

Löggum fjölgað á djamminu

Kolbeinn Tumi Daðason skrifar
Skemmtistaðir í miðbænum eru opnir til allt að 4:30 aðfaranótt laugardags og sunnudags. Má þar nefna staði eins og Austur, American bar og Loftið í Austurstræti.
Skemmtistaðir í miðbænum eru opnir til allt að 4:30 aðfaranótt laugardags og sunnudags. Má þar nefna staði eins og Austur, American bar og Loftið í Austurstræti. Vísir/Kolbeinn Tumi
Lögreglustjórinn á höfuðborgarsvæðinu og ríkislögreglustjóri vinna saman að tilraunaverkefni sem miðar að auknu sýnilegu eftirliti í miðborg Reykjavíkur. Um er að ræða göngueftirlit og reiðhjólaeftirlit auk þess sem stefnt er að fjölgun eftirlitsferða á merktum lögreglubifreiðum. Þetta kemur fram í tilkynningu frá lögreglu.

Markmiðið með verkefninu er að auka öryggi og öryggistilfinningu íbúa og gesta miðborgarinnar og fækka þar ofbeldisbrotum.

Frá árinu 2007 til 2015 hefur ofbeldisbrotum í miðborg Reykjavíkur fækkað um liðlega þriðjung, úr 534 brotum í 342. Fjöldi þeirra hefur hins vegar haldist nokkuð jafn frá 2011 og eru brotin 300 að meðaltali á því tímabili eða 25 kærur á mánuði.

Brotin eru misalvarleg með tilliti til meiðsla, allt frá minniháttar pústrum yfir í kýlingar og jafnvel spörk þar sem áverkar geta verið miklir. Þá eru ástæður þeirra mismunandi en langflest eru þau tilviljanakennd og má rekja til ölvunar.

Stytta viðbragðstíma

Setja á aukinn þunga í eftirlit lögreglu aðfaranótt laugardags og sunnudags á milli klukkan tvö og fimm. Reynslan sýni að flest ofbeldisbrot eigi sér stað á þeim tíma. Markmiðið er að koma í veg fyrir brot, stytta viðbragðstíma og auka hlutfall upplýstra brota.

Hvetur lögreglan aðra einnig til árvekni í þessu sambandi, að taka afstöðu gegn ofbeldi og gera þannig sitt til að fækka brotum.

Verkefni lögreglu verður metið vikulega og mat lagt á árangur þess. Því lýkur formlega 15. september og verður þá tekin ákvörðun um framhaldið.




Fleiri fréttir

Sjá meira


×