Erlent

Loftslagsvísindamenn segja upp New York Times

Kjartan Kjartansson skrifar
New York Times liggur undir gagnrýni vegna ráðningar á þekktum loftslagsafneitara.
New York Times liggur undir gagnrýni vegna ráðningar á þekktum loftslagsafneitara. Vísir/EPA
Bandaríska dagblaðið New York Times hefur misst áskrifendur eftir að stjórnendur þess ákváðu að ráða þekktan afneitara loftslagsvísinda til að skrifa skoðanapistla í blaðið. Vísindamenn hafa lýst vonbrigðum sínum með afstöðu blaðsins.

Times réði nýlega íhaldssama álitsgjafann Bret Stephens sem áður skrifaði pistla í Wall Street Journal. Hann er einn fjölda íhaldsmanna sem þræta fyrir vísindalega þekkingu á loftslagsbreytingum og orsökum þeirra.

Ráðningin vakti strax hörð viðbrögð, meðal annars þekktra loftslagsvísindamanna. Viðkvæði þeirra var að sjálfsagt væri að blaðið birti ólíkar skoðanir á síðum sínum en að það sem Stephens hefði fram að færa væru hreinar rangfærslur um loftslagsmál.

Ekki bætti úr skák þegar einn ritstjóra blaðsins varði ráðninguna, meðal annars með þeim orðum að hún hefði vakið reiði „vinstrisinnaðra gagnrýnenda“. Sumir fremstu loftslagsvísindamanna heims eins og Michael Mann og Stefan Rahmstorf sögðu áskrift sinni að blaðinu upp í kjölfarið. 

Aðrir, eins og tölfræðispekingurinn Nate Silver sem rekur síðuna FiveThirtyEight, bentu á kaldhæðni ráðningar Stephens í ljósi þess að slagorð New York Times eftir forsetakosningarnar í Bandaríkjunum hefur verið „Sannleikurinn er mikilvægari en nokkru sinni fyrr“.

Þó að New York Times hafi sent lesendum sínum sérstaka tilkynningu þegar fyrsti pistill Stephens birtist virtust ekki allir starfsmenn blaðsins sáttir við ráðninguna. Útibússtjóri blaðsins í Kaíró deildi til dæmis á Stephens á Twitter vegna umdeildra ummæla hans um að Arabar þjáist af „sjúkdómi hugans“.

Loftslagsblaðamenn New York Times vöktu einnig athygli á umfjöllun blaðsins um loftslagsmál á samfélagsmiðlum sama dag og pistill Stephens birtist. Þar mátti til dæmis nálgast upplýsingar sem hröktu fullyrðingar Stephens í pistlinum.

Stephens hefur ekki aðeins verið umdeildur vegna skrifa sinna um loftslagsmál. Í pistlum sínum í gegnum tíðina hefur hann meðal annars hamast gegn hreyfingunni Svört líf skipta máli í Bandaríkjunum og lýst vaxandi tíðni nauðgana í bandarískum háskólum sem „ímynduðum óvini“.

CNN fékk loftslagsafneitara í viðtal á degi jarðar

New York Times er ekki eini fjölmiðillinn sem sætir gagnrýni fyrir hvernig hann hefur nálgast loftslagsmál undanfarið. Þannig vakti það athygli að CNN fékk annan þekktan loftslagsafneitara, William Happer, til að rökræða við „vísindagaurinn“ Bill Nye daginn sem fjölmenn vísindaganga var gengin víða um heim á degi jarðar um síðustu helgi. Lýsti Nye vonbrigðum sínum með að CNN hefði fengið Happer að borðinu.

Happer, sem meðal annars hefur verið orðaður við stöðu aðalvísindaráðgjafa Donalds Trump, hefur meðal annars sagt að verið sé að „skrímslavæða“ koltvísýring á sama hátt og nasistar gerðu við gyðinga í Þýskalandi á sínum tíma.




Fleiri fréttir

Sjá meira


×