Listaverk til sýnis í fiskbúð

Fimm ungir listamenn settu á dögunum upp listaverk í fiskbúð Sjávarfangs á Ísafirði sem verður þar til sýnis næstu vikurnar. Listamennirnir eru einungis fjögurra ára gamlir og listaverkið var unnið í tengslum við verkefni þeirra á deildinni Naust á leikskólanum Sólborg á Ísafirði. Mikil undirbúningsvinna fór í verkið en strákarnir unnu það frá grunni í haust, allt frá því að útvega plötu undir verkið frá því að mála það og leita upplýsinga á netinu. Ýmsir aðilar hjálpuðu þeim þó og kann leikskólinn þeim bestu þakkir fyrir. Listamennirnir ungu völdu síðan sýningarstaðinn þar sem þeim þótti hann við hæfi þar sem það tengist sjávarútvegi.

Drengirnir eru þei Bóas Emil Þórðarson, Dagur Atli Guðmundsson, Guðjón Ólafur Stefánsson, Hjálmar Helgi Jakobsson og Kolmar Örn Baldursson.

Verkefnið er liður í hugmyndafræði kennarans og sálfræðingsins Reggio Emilia sem Sólborg hefur haft að leiðarljósi í starfseminni frá haustinu 2006. Í Reggio skólum er unnið að ákveðnum þemaverkefnum og notað til þess skapandi starf. Megin markmiðið í hugmyndafræðinni er einmitt að hvetja börnin til að nota öll sín skilningarvit og virkja frumlega og skapandi hugsun hjá þeim.

thelma@bb.is