Líðan mannsins stöðug eftir líkamsárás í Eyjum

Maðurinn sem fluttur var með sjúkraflugi til Reykjavíkur eftir líkamsárás í Vestmannaeyjum í nótt er í stöðugu ástandi, að sögn læknis á slysadeild Landspítalans í Fossvogi. Maðurinn hlaut höfuðáverka og þá einkum á andliti. Hann er enn til rannsóknar á slysadeild og verður mögulega lagður inn síðar í dag.

Tveir voru fluttir á sjúkrahús í Vestmanneyjum í nótt eftir átök fjögurra manna í Herjólfsdal. Þar tóku læknar þá ákvörðun að senda einn mannanna til Reykjavíkur en flogið var með hann á sjötta tímanum í morgun, samkvæmt upplýsingum sem fengust hjá lögreglunni í Vestmannaeyjum.