Innlent

Lesendur senda inn myndir: Stórkostlegt sólarlag í nótt

Bjarki Ármannsson skrifar
Sigrún Gunnarsdóttir tók þessa.
Sigrún Gunnarsdóttir tók þessa.
Vísir óskaði fyrr í dag eftir myndum lesenda af sólarlaginu í nótt, sem þótti einstaklega fallegt. Viðbrögðin létu ekki á sér standa og hér birtum við nokkrar af þeim myndum sem helst vöktu athygli ritstjórnar. Það var úr mörgum góðum að velja og ef myndir halda áfram að berast á ritstjorn@visir.is er aldrei að vita nema við tökum saman í aðra frétt í dag eða á morgun.

Þessa fallegu mynd hér að ofan sendi okkur Helgi Már Gunnarsson, en hann segir Sigrúnu Gunnarsdóttur hafa tekið hana og prýðir sig af því að enginn „filter“ hafi verið notaður. Myndin sýnir útsýnið frá Laugarnesinu í Reykjavík, ef blaðamanni skjátlast ekki.

Og þá að Suðurlandi, þessi sólarlagsmynd var tekin við Apavatn. Hvílík ægifegurð.

Ægifegurð við Apavatn.
Andrés Már Heiðarsson var sömuleiðis sunnanlands, hann náði þessari flottu mynd í Rauðaskógi í Biskupstungunum rétt fyrir klukkan eitt.

Andrés Már sendi þessa inn.
Þessari mynd segist Birgitta Sóley nokkur hafa náð með símanum í gegnum eldhúsgluggann. Tekin um eitt í nótt í Hafnarfirðinum.

Þetta getur síminn manns í dag.
Fimmta myndin er tekin við Gróttuvita á Seltjarnarnesi. Prýðilegur staður fyrir kvöldgöngu, en þar var hún Helga Jóna Eiríksdóttir stödd á miðnætti.

Frá Gróttu.
Þessa mynd sendi okkur Lilja Rut nokkur, en lét ekki fylgja með hvar hún er tekin. Garðabæ? Mjög falleg mynd engu að síður, þar sem himininn speglast skemmtilega í vatninu.

Meiriháttar mynd.
Sjöunda myndin er í meira lagi sérstök. Hana tók Hrönn Sigurgeirsdóttir í Grímsnesi, til vinstri á myndinni sést í Búrfell. Ótrúlegir litir á himninum, fjólublátt og sinnepsgult.

Ekki alltaf sem maður sér svona liti á himninum.
Önnur frábær mynd frá Grímsnesi fylgir hér næst á eftir. Hana tók Þóra Jónsdóttir.

Það var ekki amalegt um að lítast í Grímsnesi.
Við ljúkum þessu á mynd Maríu Guðbjargar Bárðardóttur af Tjörninni í Reykjavík. Myndin er tekin með sérstakri stillingu á Canon D20 myndavél Maríu, sem ýtir aldeilis undir sterka litina þannig að útkoman er nánast eins og málverk eftir Van Gogh.

Hvílíkt listaverk.



Fleiri fréttir

Sjá meira


×