Erlent

Lentu í mesta vatnsleka í sögu jarðganga í Noregi

Kristján Már Unnarsson skrifar
Norskir jarðgangamenn hafa nú komist fyrir mesta vatnsleka sem þarlendir hafa kynnst við gangagröft en raunir þeirra minna á það sem bormenn Vaðlaheiðarganga upplifðu. Í fréttum Stöðvar 2 var fjallað um Mælifellsgöngin á Þelamörk. 

Myndirnar í byrjun fréttarinnar, sem sjá má hér að ofan, eru ekki úr Vaðlaheiðargöngum heldur úr Noregi; úr göngum sem skandinavíska verktakafyrirtækið NCC grefur fyrir Statens vegvesen, norsku vegagerðina, í gegnum Mælefjell, eða Mælifell á Þelamörk, á leiðinni milli Haugasunds og Drammen en göngin nýtast einnig umferð milli Oslóar og Björgvinjar. 

Það sem norsku bormennirnir lentu í sýnir að bormenn Vaðlaheiðarganga eru ekki þeir einu sem þurft hafa að glíma við óvæntar uppákomur. Í norsku göngunum  opnuðust einnig vatnsæðar og svo mikill var krafturinn í bununni að Norðmenn höfðu aldrei kynnst öðrum eins vatnsþrýstingi í þarlendum jarðgöngum.

Hér fossa út tvöþúsund lítrar vatns á mínútu, sagði norska ríkissjónvarpið í frétt á síðasta ári og vatnslekinn átti eftir að aukast í þrjúþúsund lítra á mínútu. Lekinn í Vaðlaheiðargöngum var reyndar tíu sinnum meiri þegar mest gekk á þar, eða yfir 500 lítrar á sekúndu. Í frétt fyrir þremur mánuðum kom fram að norska vegagerðin óttaðist níu mánaða seinkun en ekki hafa birst tölur um viðbótarkostnað. 

Verktökunum tókst að lokum að komast fyrir vatnslekann og svo skemmtilega vill til að síðasta haftið í Mælifellsgöngunum norsku var sprengt nú í byrjun maímánaðar, um svipað leyti og í Vaðlaheiði. 

Það er raunar fleira líkt með þessum göngum. Þau eru ámóta löng; göngin undir Vaðlaheiði 7,5 kílómetrar en Mælifellsgöngin 9,4 kílómetrar. Tilgangurinn með Vaðlaheiðargöngum er að stytta leiðina um 16 kílómetra og taka af fjallveg um Víkurskarð. Tilgangurinn með þeim norsku er að stytta leiðina um 10 kílómetra og taka af seinfarinn veg í kringum fjallið en með þeim á aksturstími stórra trukka að styttast um 18 mínútur. 

Baráttu NCC við vatnsflauminn má kynnast nánar á þessu myndbandi.


Tengdar fréttir

Vaðlaheiðargöng farin 30% fram úr áætlun

Kostnaður við Vaðlaheiðargöng er samkvæmt nýjustu tölum stjórnenda verkefnisins rúmir ellefu milljarðar króna á verðlagi í árslok 2011. Verkið er því komið allt að 30 prósentum fram úr áætlun.




Fleiri fréttir

Sjá meira


×