Leikskólastjórum heimilt að loka leikskólum

Leikskólastjórum á Ísafirði er heimilt, í samráði við sviðsstjóra skóla- og tímstundasviðs sveitarfélagsins, að loka leikskólunum ef kennslu í Grunnskólanum á Ísafirði hefur verið aflýst vegna veðurs og viðvörun verið gefin út af almannavörnum. Þetta kemur fram í verklagsreglum sem auglýstar hafa verið á vef leikskólanna Eyrarskjóls og Sólborgar á Ísafirði. Leikskólastjórar í öðrum byggðarkjörnum sveitarfélagsins taka ákvarðanir í samráði við sviðsstjóra, óháð öðrum leikskólum og skal þá miðað við aðstæður hverju sinni á hverju stað.

Leikskólunum tveimur á Ísafirði er skylt að hafa samráð vegna lokana og ekki verður heimilt að loka aðeins öðrum skólanum. Ef veður versnar hins vegar síðla dags eiga leikskólastjórar að hafa samband við sviðsstjóra skóla- og tómstundasviðs sem aftur hefur samband við lögreglu og almannavarnir. Ef almannavarnir gefa út viðvörum er leikskólastjórum heimilt að hringja í foreldra og óska eftir því að þeir sæki börn sín sem fyrst og loka síðan skólunum þegar allir eru farnir.

asta@bb.is