Leikjavísir

Lego Worlds: Byggðu það sem þú vilt

Samúel Karl Ólason skrifar
Spilarar LW geta flakkað á milli ótakmarkaðs fjölda heima, sem eru byggðir eftir LEGO leikföngunum sem við þekkjum öll.
Spilarar LW geta flakkað á milli ótakmarkaðs fjölda heima, sem eru byggðir eftir LEGO leikföngunum sem við þekkjum öll.
LEGO Worlds er opinn leikur þar sem spilarar flakka á milli óendanlega margra LEGO heima og safna gullkubbum. Markmiðið er að verða Master Builder og geta byggt það sem manni sýnist. Leikurinn er fjölbreyttur og skemmtilegur, en óþarfa flókinn og oft á tíðum einhæfur.

Í grunninn er byggingakerfi LW einfalt, en þegar kemur að flóknari byggingum er umgjörðin í kringum verknaðinn ekki mjög notendavæn.

Til að byrja með er réttast að taka fram að ég er mikill aðdáandi LEGO leikjanna. Þar má oftar en ekki finna skemmtilega spilun, svartan húmor fyrir fullorðna og ýmislegt meira. Ég á þó í smá vandræðum með að átta mig á fyrir hvern LEGO Worlds var gerður.

Til að fara nánar út í það, er nánast ómögulegt að byrja á því að bera LW saman við Minecraft. LEGO Worlds virðist ætlað að taka sneið úr þeirri risastóru köku sem Minecraft hefur bakað.

Þar sem spilarar geta leikið sér við að byggja það sem þeim sýnist, hvort sem þeir eru einir eða með öðrum (á netinu eða split screen í LW), og reyna að drepa drekann ógurlega. Eða ekki. Spilarar ráða sér alveg sjálfir og þar eru mikil líkindi á milli leikjanna, en samt ekki.

Heimar Lego jafn fjölbreyttir og kubbarnir sjálfir bjóða upp á.
Spilarar LW geta flakkað á milli ótakmarkaðs fjölda heima, sem eru byggðir eftir LEGO leikföngunum sem við þekkjum öll. Einn heimur getur verið byggður eins og sjóræningjaheimur, annar getur verið borg, fen, skógur og svo framvegis. Heimarnir eru þó ekki endalausir eins og í MinecraftSpilarar þurfa að flakka á milli heima og leysa hin ýmsu verkefni til þess að fá gullkubba og verða svokallaður Master Builder.

Á þeirri ferð safna spilarar einnig teikningum og öðru sem þeir geta svo byggt seinna meir. Þá læra þeir líka að beita byggingartólum leiksins, sem eru óþarfa flókin.

Þar liggur helsti munur leikjanna. Minecraft byggir á einföldum byggingum og frelsi, en LW byggir á frelsi og flóknum byggingum, mjög gróflega séð. Þá er óþarflega flókið að byggja í LW, sem er fylgifiskur þessa mikla framboðs af heimum og misstórum kubbum. Möguleikarnir eru endalausir, sem flækir hlutina.

Þá þvælist umhverfið oft fyrir þegar verið er að byggja. Ég sá stundum ekkert hvað ég var að gera vegna skringilegs sjónarhorns.

Einnig er hægt að setja út á bardaga í LW og stýringu aðalpersónunnar. Hvort sem maður er að berjast með hnefunum, skammbyssum, sverðum eða bogum, er ekkert mið í boði og spilarar lenda oft í því að slá og skjóta út í loftið.

Hæpið er að börn geti spilað leikinn og lært á hann ein, en það tekur nokkra klukkutíma að safna saman þeim tólum og teikningum sem þarf til að geta farið að byggja eins og brjálæðingur.

Það er þó ekki eins og fullorðnir hafi ekki líka gaman af því að byggja úr LEGOkubbum, þó það sé á stafrænu formi.

Þegar frelsinu er náð og spilarar eru búnir að safna nægilega mörgum gullkubbum, geta þeir opnað stærri heima og farið að leika sér að vild. Byggja kastala, hús, styttur og margt fleira. Svo má eyðileggja kastala, hús, styttur og margt fleira, sem er ekkert leiðinlegra en að byggja.

Andrúmsloft LEGO Worlds er nokkuð sérstakt og hann er skemmtilegur. Hann lítur vel út og það er lúmskt skemmtilegt að upplifa heimana sem maður reyndi, en gat aldrei, að byggja þegar maður var krakki. Tæknileg atriði eins og byggingartólin, stjórnkerfi, einsleit verkefni og smávægilegir gallar halda honum þó niðri.






Fleiri fréttir

Sjá meira


×