Leggst gegn frekari framlögum í Framtakssjóðinn

Stjórn Félags vélstjóra og málmtæknimanna lýsir yfir furðu sinni á fjárfestingum Framtakssjóðs Íslands og telur þær fara langt fram úr samþykktum sjóðsins. Fyrr í vikunni gagnrýndi miðstjórn Bandalag háskólamanna fjárfestingar sjóðsins og lagðist alfarið gegn frekari framlögum lífeyrissjóða félagsmanna sinna til sjóðsins.

Gagnrýnt hefur verið að Framtakssjóðurinn hafi samið um kaup á Vestia af Landsbankanum fyrir 19,5 milljarða þegar sjóðurinn mun hafa um 30 milljarða til að fjárfesta næstu þrjú árin.

Stjórn Félags vélstjóra og málmtæknimanna telur að til greina komi að lífeyrissjóðir félagsmanna félagsins dragi sig út úr Framtaksjóðnum. Ekki hafi verið farið eftir þeim verklagsreglum og samþykktum sem stjórnir lífeyrissjóða okkar félagsmanna gengu útfrá þegar þær samþykktu að leggja fjármuni í sjóðinn.

Tengls við banka skaða sjóðinn

Stjórnin telur að það skaði Framtakssjóðinn og geri hann ótrúverðugan að tengjast banka eða bönkum.

„Stjórn VM lýsir yfir áhyggjum sínum af því að í framhaldi af þessum fjárfestingum verði settur þrýstingur á lífeyrissjóðina að koma með fjármagn inn í fyrirtæki sem Framtaksjóðurinn fjárfestir í til að verja fjárfestingar hans. Það er skoðun stjórnar VM að til að hægt verði að byggja upp traust verði að tryggja gegnsæi og að farið verði eftir samþykktum og lögum í samfélaginu," segir yfirlýsingu stjórnar sjóðsins.

Miðstjórn BHM ósátt

Miðstjórn Bandalags háskólamanna kallaði á þriðjudaginn eftir því í ályktun að Framtakssjóður Íslands sýndi fram á með óyggjandi hætti að fjárfestingar sjóðsins fylgdu tilgangi og skilmálum sjóðsins. Þá lagðist miðstjórnin gegn frekari framlögum í sjóðinn.