Innlent

Leggjast gegn því að farið verði svo bratt í breytingar á menntun lögreglumanna

sunna karen sigurþórsdóttir skrifar
Lögreglunám verður fært á háskólastig, verði frumvarp innanríkisráðherra að lögum.
Lögreglunám verður fært á háskólastig, verði frumvarp innanríkisráðherra að lögum. vísir/daníel
Félag íslenskra rannsóknarlögreglumanna leggst gegn því að frumvarp innanríkisráðherra um breytingar á lögreglulögum verði samþykkt óbreytt. Lögreglunám verður fært á háskólastig frá og með næsta hausti og Lögregluskóli ríkisins lagður niður verði frumvarpið að lögum.

Þetta kemur fram í umsögn félagsins við frumvarpið. Þar segir að nauðsynlegt sé að vinna breytingarnar yfir lengri tíma og að ekki sé aðkallandi að nám hefjist strax. Skyndilegar umbreytingar hafi gjarnan verið leið íslenskra stjórnvalda og stjórnmálamanna án þess að hugað sé nægilega að öllum þáttum.

Lagt er til að háskólanám fyrir íslenska lögreglumenn hefjist að fullu haustið 2020. Á meðan eigi að sinna undirbúningi náms og skipulagi í samvinnu við starfsmenn Lögregluskólans og aðra.

Þá telur félagið hvorki nauðsynlegt né tímabært að leggja Lögregluskólann niður, heldur þurfi að styðja hann og styrkja hann. Skólinn sinni mikilvægu hlutverki hvað varðar framhaldsmenntun enda þurfi lögreglumenn í sífellt meiri mæli að sækja sér þjálfun og kunnáttu í starfi.

Jafnframt fer félagið fram á það að gætt verði að því að þeir starfsmenn skólans, verði þeir færðir, hljóti eins og aðrir starfsmenn í sambærilegum breytingum, störf innan lögreglu og haldi réttindum sínum og starfsstigi. Full þörf sé á reynslu þeirra og kunnáttu.

Auðn blasi við í lögregluliðum landsins

Landssamband lögreglumanna gerir í umsögn sinni skýlausa kröfu um að lögreglumönnum sem starfa við Lögregluskólann verði gefinn kostur á flutningi yfir í hið nýja menntunar- og starfsþróunarsetur lögreglunnar.

Þá lýsir sambandið yfir áhyggjum, í ljósi þess hve bratt er farið í því að ætla að koma hinu nýja fyrirkomulagi um menntun lögreglumanna í framkvæmd, að það horfi í raun við auðn í lögregluliðum landsins. Ljóst sé að þær aukafjárveitingar sem settar hafi verið inn í málaflokkinn á umliðnum árum hafi ekki skilað sér að því marki sem þeim hafi verið ætlað, til dæmis þegar komi að fjölgun lögreglumanna.

Sambandið segist hafa upplýsingar um það að þó nokkur fjöldi lögreglumanna sé þessi misserin við nám sem miða að því að þeir sæki um og fái önnur og mun betur launuð störf en bjóðast við löggæslu.




Fleiri fréttir

Sjá meira


×