Viðskipti innlent

Landspítali eða RÚV?

Skjóðan skrifar
Sjálfur Landspítalinn er þröngur og úr sér genginn. Ef til væru fjármunir fyrir nýjustu lækningatækjum kæmust þau ekki fyrir í núverandi húsnæði spítalans.
Sjálfur Landspítalinn er þröngur og úr sér genginn. Ef til væru fjármunir fyrir nýjustu lækningatækjum kæmust þau ekki fyrir í núverandi húsnæði spítalans.
Heilbrigðiskerfið á Íslandi virðist vera að molna. Brostin eru á verkföll lækna, það er þeirra sem enn eru eftir á Íslandi, því mikill fjöldi lækna og annars heilbrigðisstarfsfólks hefur þegar yfirgefið landið og gengur nú til starfa í Noregi, Svíþjóð og víðar. Margir læknar virðast kjósa að koma alls ekki heim úr framhaldsnámi erlendis. Biðlistar í heilbrigðiskerfinu lengjast og víða úti á landi er varla boðið upp á fulla heilbrigðisþjónustu.

Sjálfur Landspítalinn er þröngur og úr sér genginn. Ef til væru fjármunir fyrir nýjustu lækningatækjum kæmust þau ekki fyrir í núverandi húsnæði spítalans. Heilu álmurnar eru ónothæfar vegna myglu og fúa.

Á sama tíma verja skattgreiðendur 3,5 milljörðum til Ríkisútvarpsins á hverju ári. Ofan á framlag skattgreiðenda leggjast auglýsingatekjur þannig að þegar upp er staðið hefur RÚV úr næstum 5,5 milljörðum á ári að spila.

En þetta virðist ekki vera nóg. Stjórnendur RÚV kveinka sér heil ósköp yfir því að milljarðarnir dugi ekki fyrir sómasamlegum rekstri og hafa safnað skuldum upp á næstum 1,5 milljarða á tveimur árum vegna þess, sem þeir lýsa sem fjársvelti. Er í alvöru ekki hægt að halda úti þokkalegri dagskrá í útvarpi og sjónvarpi fyrir minna en 5,5 milljarða?

Séu framlög skattgreiðenda til RÚV skoðuð í samhengi við annað og reiknuð inn í framtíðina út frá ávöxtunarkröfu verðtryggðra skuldabréfa á markaði, eins og Óðinn Viðskiptablaðsins gerði í síðustu viku, kemur í ljós að skuldbinding ríkisins vegna þeirra nemur vel á annað hundrað milljörðum.

Skoðum þetta nú aðeins í samanburði við Landspítalann og heilbrigðiskerfið. Talið er að það kosti innan við 100 milljarða að reisa nýjan Landspítala. Ekki eru allir sammála um ágæti þess að reisa nýtt hátæknisjúkrahús í Vatnsmýrinni og eflaust er hægt að bæta úr húsnæðis- og tækjaþörf Landspítalans fyrir mun minna en 100 milljarða þannig að eftir yrðu fjármunir til að efla og viðhalda heilbrigðisþjónustu hringinn í kringum landið. Ef við viljum styðja við ferðaþjónustu um allt land gengur hvort eð er ekki að hlaða allri heilbrigðisþjónustu í Vatnsmýrina í Reykjavík.

Einhvern veginn er svo augljóst að fyrir þá fjármuni sem renna úr almannasjóðum til RÚV má halda úti fjölmiðli sem uppfyllir menningar- og öryggishlutverk RÚV jafnframt því sem bætt er úr brýnni tækja- og húsnæðisþörf Landspítalans og jafnvel eitthvað sett til hliðar til að tryggja heilbrigðisþjónustu utan póstnúmers 101.

Skjóðan  er frekju- og leiðindaskjóða, sem lætur ekkert mannlegt sér óviðkomandi.


Tengdar fréttir

Ekki sama hver lánar

Hér á landi hefur alltaf skipt miklu máli hvort það er Jón eða séra Jón sem á í hlut. Í síðustu viku kom það fram hjá Sigmundi Davíð Gunnlaugssyni forsætisráðherra í umræðum á Alþingi að verklagsferlar hafi ekki verið hefðbundnir þegar Seðlabankinn lánaði Kaupþingi 500 milljónir evra (76 milljarða króna) með veði í danska bankanum FIH í byrjun október 2008.

Vaxtaokrið er myllusteinn um háls Íslands

Íslensk fyrirtæki geta ekki keppt á jafnréttisgrundvelli við erlend fyrirtæki. Á það jafnt við um samkeppni á erlendum mörkuðum og samkeppni á innanlandsmarkaði. Löggjafinn hefur reynt að styrkja samkeppnisstöðu innlendra matvælaframleiðenda gagnvart innflutningi með hvers kyns viðskiptahömlum og tollavernd. Jafnvel hefur verið gengið svo langt að undanskilja einstaka þætti innlendrar matvælaframleiðslu almennum samkeppnisreglum.






Fleiri fréttir

Sjá meira


×