Erlent

Landamærum lokað til að hefta útbreiðslu Ebólunnar

Stefán Ó. Jónsson skrifar
Frá heilsugæslustöð í Síerra Leóne.
Frá heilsugæslustöð í Síerra Leóne. Vísir/AFP
Forseti Líberíu hefur lokað öllum nema þremur landamærastöðvum í landinu, bannað samkomur og einangrað samfélög sem hafa orðið illa úti vegna Ebólu-veirunnar sem nú leikur lausum hala í Vestur-Afríku.

Ellen Johnson Sirleaf forseti kynnti aðgerðirnar í gær á fyrsta fundi nýs samráðshóps sem stemma á stigu við útbreiðslu sjúkdómsins sem dregið hefur um 130 manns til bana í landinu og tæplega 700 í vesturhluta álfunnar.

„Ebólu-vírusinn er nú, án efa, orðin mikil ógn við heilsu þjóðarinnar,“ sagði Sirleaf. „Og eins og við höfum nú orðið vör við ræðst hann gegn lifnaðarháttum okkar með geigvænlegum efnahags- og félagslegum afleiðingum.“

Sem fyrr segir var öllum nema þremur landamærastöðvum lokað – ein þeirra liggur að Síerra Leóne, önnur að Gíneu og sú þriðja að báðum ríkjunum.

Ellen Johnson Sirleaf, forseti Líberíu.
Bann hefur verið lagt við hvers kyns opinberum samkomum í landinu til að sporna við smithættu og hefur veitingastöðum og öðrum álíka vettvöngum verið gert að sýna fimm mínútna langt fræðslumyndband um hættur veirunnar.

Öryggisveitum landsins var gert að sjá til þess að nýju reglugerðinni yrði fylgt eftir í landinu og einnig að aðstoða við hvers kyns sjúkraflutninga.

Forseti Síerra Leóne, Ernest Bai Koroma, tilkynnti fyrr í dag að hann hygðist heimsækja lækninn Sheik Umar Khan sem leiddi baráttuna gegn veirunni í landinu en Vísir greindi frá því á miðvikudag að hann hafi sýkst sjálfur af sjúkdómnum. Samkvæmt upplýsingum frá heilsugæslustöðinni sem Khan hvílir á, sem er á vegum Lækna án landamæra, hefur hann brugðist vel við meðferðinni. Sheik Umar Khan, er í miklum metum og litið er á hann sem „þjóðarhetju“  í Síerra Leóne fyrir vasklega framgöngu hans gegn sjúkdómnum.

Engin lækning er til við Ebólu sem getur dregið níu af hverjum tíu til dauða sem smitast af veirunni en dánarhlutfall faraldursins sem nú geisar er um 60 prósent. Ebóla dregur nafn sitt af fljóti í Austur-Kongó þar sem veiran kom fyrst upp árið 1976. Þá dró hún 280 manns til dauða en alls hafa 1600 manns fallið af hennar völdum frá miðjum áttunda áratug síðustu aldar.   Í kjölfar smits herjar veiran á nær öll líffæri manneskjunnar og étur upp vefi líkamans.

Sérfræðingar telja að upptök núverandi faraldar megi rekja til suðausturhluta Gíneu einhvern tímann í janúarmánuði á þessu ári, þrátt fyrir að fyrsta staðfesta tilvikið hafi ekki litið dagsins ljós fyrr en í mars.

Flestir hafa látið lífið í Gíneu, um 319 talsins, en á síðustu misserum hafa flestir fallið í Síerra Leóne.

Núverandi faraldur er sá banvænasti í sögunni.


Tengdar fréttir

Ebóla berst til Nígeríu

Stjórnvöld í Nígeríu hafa staðfest að líberskur maður hefði látist úr Ebóluveiru þar í landi, fjölmennasta ríki í Afríku.

Tveir Bandaríkjamenn greinast með Ebóla

Fjölmargir læknar og aðrir heilbrigðisstarfsmenn sem vinna að meðhöndlun ebólufaraldursins í Vestur-Afríku hafa greinst með veiruna.

Ebóla breiðist enn út

Um 330 manns hafa látist í Vestur-Afríku á þessu ári af völdum e-bólu veiru. Sjúkdómurinn er sagður sá allra versti og skæðasti í sögunni.

Ebóla breiðist hratt út með jarðarförum

Gunnhildur Árnadóttir, starfsmaður Lækna án landamæra, starfaði á vettvangi ebóluveiru í Gíneu. Ástandið á svæðinu er afar slæmt og erfitt að ná tökum á því. Siðir við útfarir eru taldir mesti útbreiðsluvaldur

Ebóla-faraldurinn stjórnlaus

Ebóla-faraldurinn sem geisar í þremur löndum í Vestur-Afríku er orðinn stjórnlaus, að sögn samtakanna Læknar án landamæra.

Hæsta viðbúnaðarstigi lýst yfir

Yfirvöld í Nígeríu hafa lýst yfir hæsta viðbúnaðarstigi eftir að karlmaður frá Líberíu lést úr ebólu þar í landi í vikunni.

Ebóla hugsanlega í Kanada

Grunur leikur á að karlmaður, sem nýverið kom til Kanada frá Vestur-Afríku, hafi smitast af ebólu vírusnum. Karlmaðurinn er í lífshættulegu ástandi á sjúkrahúsi í Saskatoon í Kanada.




Fleiri fréttir

Sjá meira


×