Enski boltinn

Lampard: Ef Terry fær ekki nýjan samning hjá Chelsea flýg ég honum hingað

Tómas Þór Þórðarson skrifar
John Terry gæti verið samningslaus eftir tímabilið.
John Terry gæti verið samningslaus eftir tímabilið. vísir/getty
Frank Lampard, leikmaður New York City FC, er tilbúinn að borga undir flugfarið fyrir John Terry, fyrirliða Chelsea, til Bandaríkjanna ef hann verður ekki áfram á Brúnni.

Terry býst við því að yfirgefa Chelsea eftir tímabilið en Lundúnarliðið á enn eftir að bjóða honum nýjan samning.

Lampard fór frá Chelsea til New York City FC sem spilaði sitt fyrsta tímabil í MLS-deildinni á síðasta tímabili og vill fá sinn gamla fyrirliða þangað.

„Hann er besti varnarmaður sem ég hef spilað með og enginn er eiginlega nálægt honum á þeim lista. Þannig ef Chelsea lætur hann fara og John hefur ekkert betra að gera borga ég fyrir hann flugmiðann hingað,“ segir Lampard í viðtali við ShortList Magazine.

„Ég vil sjá Chelsea bjóða honum nýjan samning. Mér sýnist augljóst að hann vill vera áfram og hann getur alveg spilað áfram fyrir liðið.“

„Auðvitað erum við John vinir en það dregur ekkert úr því sem hann hefur afrekað á vellinum. Hann hefur verið besti varnarmaður Chelsea á þessu tímabili,“ segir Frank Lampard.




Fleiri fréttir

Sjá meira


×