Innlent

Kvíðin á hverjum einasta degi

Hödd Vilhjálmsdóttir skrifar
Herborg Svana Hjelm fæddi stúlku í heiminn fyrir nítján árum síðan og fékk sú stutta nafnið Sunneva Ýr og er Sævarsdóttir. Sunneva var brosmild og skemmtileg stelpa sem átti stundum erfitt með að hemja skapið þegar henni mislíkaði eitthvað.

Þrettán ára gömul var Sunneva greind með mikla ofvirkni og byrjaði að taka inn Rítalín og leiddist eftir það inn á braut fíkniefna. Foreldar Sunnevu reyndu allt sem þau gátu til að fá hjálp fyrir dóttur sína en það getur reynst þrautinni þyngra að fá viðeigandi aðstoð þegar fíkniefnaneysla og geðræn vandamál barna og ungmenna fara saman.

Sextán ára gömul var Sunneva svo loks greind með geðhvarfasýki en var á þeim tíma of langt leidd í vímuefnaneyslu til þess að taka inn geðlyfin sem gátu hjálpað henni í átt að bata. Ísland í dag ræðir í kvöld við Herborgu, móður Sunnevu,sem lýsir erfiðum árum í lífi fjölskyldunnar en í dag er Sunneva búin að vera edrú í nokkra mánuði, tekur að staðaldri inn lyfin sín og er því í góðu jafnvægi.

Ísland í dag ræðir líka í kvöld við Súsönnu Sif Jónsdóttur, en hún er í dag 23 ára gömul og hefur átt við geðræn vandamál að stríða frá barnsaldri. Þá misnotaði hún eiturlyf í mörg ár en náði að snúa blaðinu við fyrir tæpum þremur árum síðan.

Málþing Geðhjálpar og Olnbogabarna um börn og ungmenni með geðrænan- og vímuefnavanda verður haldið á Grand Hótel Reykjavík á morgun fimmtudag. Nánari upplýsingar og skráningu á málþingið má nálgast hér.




Fleiri fréttir

Sjá meira


×