Kveður geimstöðina með tónlistarmyndbandi

Kanadíski geimfarinn Chris Hadfield hefur slegið í gegn á Youtube með bæði fyndnum og áhugaverðum myndböndum sem hann tekur um borð í Alþjóðlegu geimstöðinni.

Fyrir stuttu sáu lesendur Vísis hann vinda tusku í geimnum, en í þyngdarleysi verður sá hversdagslegi verknaður að sannkallaðri veislu fyrir augað.

En nú hefur geimgrallarinn sent frá sér heilt tónlistarmyndband. Myndbandið er líkt og fyrri myndbönd kappans, tekið um borð í geimstöðinni, og er við hans útgáfu af laginu Space Oddity, sem David Bowie gerði vinsælt á sínum tíma.

Tilefnið var kveðjustund geimfarans, en leiðangri hans er lokið í bili og mun hann snúa aftur til jarðar. Það er rússneski geimfarinn Pavel Vinogradov sem tekur við stjórn stöðvarinnar.

Myndbandið má sjá í spilaranum hér að ofan.