Enski boltinn

Koss dauðans stóð undir nafni

Óskar Ófeigur Jónsson skrifar
Claudio Ranieri er ekki lengur knattspyrnustjóri því hann var eins og flestir vita rekinn í gærkvöldi aðeins níu mánuðum eftir að hann gerði Leicester City að enskum meisturum.

Ranieri var ennfremur rekinn aðeins sextán dögum eftir að hann fékk sérstaka stuðningsyfirlýsingu frá yfirmönnum félagsins.

Leicester City sendi frá sér yfirlýsingu 7. febrúar síðastliðinn þar sem haldið var fram að Claudio Ranieri væri með óbifanlegan stuðning sem knattspyrnustjóri félagsins.

Blaðamenn voru fljótir að tala um að það væri eins og „koss dauðans“ að fá yfirlýsingu sem þessa. Claudio Ranieri var meira að segja spurður út í það á blaðamannafundi og brosti bara vandræðalega.  

Leicester City hafði þá steinlegið 3-0 á heimavelli á móti Manchester United tveimur dögum fyrr.

Þrátt fyrir þennan mikla stuðning frá yfirboðurum sínum hjá Leicester City þá fékk Claudio Ranieri aðeins fjóra leiki til viðbótar og þrír þeirra töpuðust.

Ranieri byrjaði reyndar á því að stýra Leicester City til 3-1 sigurs á móti Derby County í enska bikarnum eftir framlengdan leik en sá dramatíski sigur var þó ekki nóg til að kveikja á hans mönnum.

Næstu þrír leikir töpuðu allir og nú er Ítalinn atvinnulaus á ný. Fyrst tapaði liðið 2-0 í ensku deildinni á móti Swansea, svo 1-0 í enska bikarnum á móti Millwall og loks 2-1 í Meistaradeildinni á móti Sevilla.  Leicester skoraði reyndar mikilvægt útivallarmark undir lokin og úrslitin því ekki alslæm en ekki voru þau þó nógu góð til þess að bjarga starfi Ranieri.

Ranieri ætti nú að þekkja það betur en flestir að vera rekinn úr starfi því í þeirri stöðu hefur hann lent margoft á ferlinum.  Hann ætti heldur ekki að eiga í vandræðum með að fá nýtt og spennandi starf í fótboltanum enda sá eini sem getur sagt: Ég gerði Leicester City að Englandsmeisturum.



Leicester City eyddi yfirlýsingu sinni út frá 7. febrúar en hún var svona:

„In light of recent speculation, Leicester City football club would like to make absolutely clear its unwavering support for its first team manager, Claudio Ranieri.

„While there is a collective appreciation from everyone at the club that recent form needs to improve, the unprecedented success achieved in recent seasons has been based firmly on stability, togetherness and determination to overcome even the greatest of challenges.

„The entire club is and will remain united behind its manager and behind its players, collectively and firmly focused on the challenges ahead."




Fleiri fréttir

Sjá meira


×