Skoðun

Komum heil heim

Hanna Birna Kristjánsdóttir skrifar
Nú um verslunarmannahelgi eru margir á faraldsfæti og úti um allt land eru vel sóttar fjölskyldu- og útihátíðir. Á hverju ári heyrum við fréttir af mikilli umferð á okkar helstu vegum, gangi mála á útihátíðum og auðvitað af hinu víðfræga íslenska veðri. Eftir þessa miklu ferðahelgi berast okkur, því miður of oft, neikvæðar fréttir af alvarlegum slysum í umferðinni og jafnvel banaslysum.

Við höfum náð mjög góðum árangri í forvarnarstarfi í umferðinni á síðustu árum. Frá síðustu aldamótum hefur banaslysum í umferðinni fækkað um meira en helming. Sé tekið tillit til aukins fjölda bifreiða og aukinnar umferðar almennt hefur slysum fækkað hlutfallslega meira. Þessi árangur er ekki tilviljunarkenndur, heldur afrakstur mikillar vinnu og samtakamáttar fjölmargra aðila. Þetta er það sem við Íslendingar gerum vel; að vinna saman að settum markmiðum.Þegar margar hendur takast á við flókin og erfið verkefni getur árangurinn verið framar öllum vonum og það á svo sannarlega við þegar kemur að umferðaröryggi.

Eðli málsins samkvæmt samanstendur umferðin af þremur meginþáttum: ökumönnum, bifreiðum og vegum. Við sem berum á því ábyrgð leggjum okkur fram um að tryggja það að vegirnir séu í lagi, að umferðareftirlit sé öflugt og að vel sé fylgst með ástandi bifreiða.

Eitt helsta markmið mitt sem innanríkisráðherra er að auka öryggi almennings og þar er öryggi í umferðinni ekki undanskilið. Við höfum nú þegar fjölgað lögreglumönnum og aukið akstur lögreglubifreiða, sem tryggir aukið eftirlit á vegum landsins. Að sama skapi hefur Vegagerðin lagt áherslu á viðhald vega með það að markmiði að gera þá betri og öruggari. Við þetta bætist aukin fræðsla frá Samgöngustofu og eins frá einkaaðilum á borð við FÍB og fleirum sem láta sig varða umferðaröryggi. Öllum þessum aðilum ber að þakka fyrir framlag þeirra til að auka öryggi okkar í umferðinni.

En við berum öll ábyrgð á okkur sjálfum sem ökumönnum og hegðun okkar í umferðinni. Þess vegna skulum við sameinast um það markmið að skila okkur og okkar nánustu heilum heim að lokinni verslunarmannahelgi.

Ég óska þess að þið lesendur góðir eigið góða og örugga helgi – og komið heil heim.




Skoðun

Skoðun

Sigur­bogi

Dagbjört Ósk Steindórsdóttir skrifar

Sjá meira


×