Enski boltinn

Klopp um Teixeira: Þið verðið að treysta okkur

Tómas Þór Þórðarson skrifar
Jürgen Klopp vildi ekki Teixeira fyrir 50 milljónir punda.
Jürgen Klopp vildi ekki Teixeira fyrir 50 milljónir punda. vísir/getty
Jürgen Klopp, knattspyrnustjóri Liverpool, segir að stuðningsmenn liðsins verði að treysta því að forráðamenn þess tóku rétta ákvörðun með að kaupa ekki Alex Teixeira frá Shakhtar í janúarlugganum.

Liverpool reyndi hvað það gat að kaupa þennan 26 ára gamla Brasilíumann og bauð er sagt allt að 38 milljónir punda í leikmanninn. Shakhtar er sagt vilja 50 milljónir punda fyrir hann.

„Það er mikilvægt að þið treystið okkur,“ sagði Klopp á blaðamannafundi fyrir leik sinna manna gegn toppliði Leicester í ensku úrvalsdeildinni í kvöld. „Þetta var einföld ákvörðun. Við getum ekki spilað þennan leik allt til enda.“

„Við gerðum tilboð en meira get ég ekki sagt um það. Tilboðin okkar voru sov sannarlega raunveruleg ef við tökum líka mið af því að það er janúar.“

„Það er ekki eins og við eigum ekki pening en við verðum að vinna af virðingu og gera það skynsamlega. Þannig gerum við hlutina. Við munum kaupa leikmenn. Við gerðum það ekki í þessum glugga en það mun gerast,“ sagði Jürgen Klopp.

Alex Teixeira gekk í raðir Shakhtar frá Vasco da Gama í Brasilíu 2009 og hefur síðan slegið í gegn með úkraínska liðinu. Hann er búinn að skora 89 mörk í 222 leikjum, þar af 22 í 15 leikjum á þessari leiktíð.




Fleiri fréttir

Sjá meira


×