Tíska og hönnun

Klassísk með smá „fútti“

Ragnheiður Tryggvadóttir skrifar
Ási Már Friðriksson fatahönnuður (t.v.) kynnti nýja herralínu á dögunum undir heitinu ASI MAR.
Ási Már Friðriksson fatahönnuður (t.v.) kynnti nýja herralínu á dögunum undir heitinu ASI MAR. Myndir/Íris Dögg Einarsdóttir
„Ég ákvað að hætta að kvarta yfir því að finna aldrei nein föt á sjálfan mig sem mér líkaði og hanna þau bara sjálfur,“ segir Ási Már Friðriksson fatahönnuður.

Ási kynnti glænýja herralínu á dögunum undir merkinu ASI MAR.

Ási er einn þeirra hönnuða sem standa að Tískubúðinni P3, Miðstræti 12 við Skálholtsstíg, og fyrst um sinn fæst línan þar en ætlunin er að koma línunni í fleiri verslanir þegar fram líða stundir.

Ási segir þessa fyrstu línu smáa í sniðum. 

„Ég hef aðallega hannað kvenfatnað fram að þessu og þar getur maður leyft sér miklu meira þegar kemur að stærð og sniðum. 

Við vinnslu herralínunnar setti ég mér ­ákveðið form til að vinna inn í, sem er skemmtileg tilbreyting. Ég vildi líka finna út úr því í hvaða átt ég vildi fara með þessa fyrstu línu og einbeitti mér að efri pörtum.

Ég hélt lítið boð hér á vinnustofunni í P3 um daginn fyrir þá nánustu, til að koma og skoða fatnaðinn. Viðbrögðin við línunni voru góð og fyrsti hluti framleiðslunnar fór hratt. Ég á von á seinna hollinu fljótlega. Sniðin eru klassísk herra­snið, aðsniðnar skyrtur, stuttermabolir og peysa.

Ég vildi gera aðgengileg föt, klæðileg og klassísk en þó með svolítilli leikgleði. Mér finnst hana oft vanta. Það má ekki taka hlutina of alvarlega.”

Leikgleðina má sjá í munstrum og grafík. Ási vinnur sjálfur munstrin og lætur prenta þau á hefðbundin skyrtuefni fyrir sig erlendis. Munstrin sækir hann í plönturíkið.

„Ég var í miklum vorfíling þegar ég vann línuna og nota því mikið plöntumunstur og blóm og vann ­einnig grafík með munstrunum.

Ég er þegar farinn að huga að vetrarlínunni. Þá verða munstrin miklu grafískari og mínímalískari. Vetrarlínan verður einnig dekkri, og hún verður eitthvað stærri og meira úrval. Þetta er fatnaður sem mig myndi sjálfan langa í, klassískur en með smá fútti í.“

Orri Helgason frá Eskimo sat fyrir á myndunum fyrir ASI MAR.
Um förðun sá Diego Batista og Steinunn Ósk sá um hárgreiðslu.
Myndirnar tók Íris Dögg Einarsdóttir.

Tengdar fréttir






Fleiri fréttir

Sjá meira


×